ورالدىق ستۋدەنت حالىقارالىق بايقاۋدا توپ جاردى. ول تاتارستاندا وتكەن ءبىلىم دوداسىندا ۇزدىك اتانىپ، تسيفرلىق اقپارات وڭدەۋ سالاسىنداعى كاسىبي شەبەرلىگىن الەمدىك دەڭگەيدە دالەلدەدى.
بقو ورال قالاسىنداعى جوعارى ينجەنەرلىك-تەحنولوگيالىق كوللەدجىنىڭ ستۋدەنتى يحسان بەكەت ەرجانۇلى حالىقارالىق دارەجەدە زور جەتىستىككە قول جەتكىزدى.بۇل تۋرالى باتىس قازاقستان وبلىسى ءبىلىم باسقارماسىنىڭ ءباسپاسوز قىزمەتى حابارلادى. ول تاتارستان رەسپۋبليكاسىنىڭ ءبىلىم جانە عىلىم مينيسترلىگى ۇيىمداستىرعان IV حالىقارالىق «لۋچشي پو پروفەسسي — ماستەر پو وبرابوتكە تسيفروۆوي ينفورماتسي» كاسىبي شەبەرلىك بايقاۋىندا 1-ورىن يەلەنىپ، ۇزدىك دەپ تانىلدى.
بايقاۋدىڭ ماقساتى – IT سالاسىندا ءبىلىم الىپ جاتقان ستۋدەنتتەردىڭ كاسىبي دەڭگەيىن باعالاۋ، تسيفرلىق اقپاراتتى وڭدەۋ، جۇيەلەۋ جانە تالداۋ بويىنشا داعدىلارىن سىناۋ، سونداي-اق حالىقارالىق تاجىريبە الماسۋعا مۇمكىندىك بەرۋ.
سايىس بارىسىندا قاتىسۋشىلارعا كۇردەلى تەحنيكالىق تاپسىرمالار جۇكتەلدى. يحسان بەكەت بۇل سىناقتاردان سۇرىنبەي ءوتىپ، جوعارى كاسىبي دايىندىق پەن تەحنيكالىق ساۋاتتىلىعىن كورسەتتى. قازىلار القاسى جاس ماماننىڭ جۇمىسىن جوعارى باعالاپ، وعان ءبىرىنشى ورىندى لايىق دەپ تاپتى.
بۇل جەڭىس – جەكە تابىستان بولەك، وتاندىق تەحنيكالىق جانە كاسىپتىك ءبىلىم بەرۋ جۇيەسىنىڭ الەۋەتىن دالەلدەيتىن ناقتى كورسەتكىش. سونداي-اق، جاستاردىڭ زاماناۋي تسيفرلىق ماماندىقتارعا دەگەن قىزىعۋشىلىعىن ارتتىرىپ، ولاردىڭ حالىقارالىق دەڭگەيدە دە باسەكەگە قابىلەتتى ەكەندىگىن پاش ەتەدى.يحساننىڭ بۇل تابىسى – جەتەكشىسى ا.ا. قاسيەتوۆا مەن كوللەدج ۇجىمىنىڭ جۇيەلى ەڭبەگىنىڭ ناتيجەسى ەكەنى ءسوزسىز.
باتىس قازاقستان وبلىسى ءبىلىم باسقارماسىنىڭ باسشىلىعى جاس ماماندى ۇلكەن جەتىستىگىمەن قۇتتىقتاپ، الداعى كاسىبي جولىنا ساتتىلىك تىلەدى.
