الماتىدا وزىنە قول سالعان ەكىنشى ساناتتاعى سەرجانت ەربول مۇسابالانوۆتىڭ تۋىستارى اسكەريدىڭ ولىمىنە كىنالىلەردى جازاعا تارتۋدى تالاپ ەتتى. ويتكەنى، ول حاتىندا ولىمىنە كىنالى ءۇش ادامنىڭ اتىن جازىپ كەتكەن، دەپ حابارلايدى “ادىرنا” ءتىلشىسى «ينفورمبيۋرو» باعدارلاماسىنا سىلتەمە جاساپ.
جاقىندارى مەن دوستارى ەربول مۇسابالانوۆتىڭ ناعىز پاتريوت بولعانىن ايتادى. ول اسكەري قىزمەتكە 23 جىلىن ارناعان. ولىمىنە دە شىنشىلدىعى سەبەپ بولۋى مۇمكىن دەيدى تۋىستارى.
«ءوز حاتىندا ول «مەنىڭ ولىمىمە قاباقوۆ، ءىلياسوۆتى، ەكىنشى ساناتتاعى سەرجانت ماجيتوۆتى كىنالاڭدار» دەپ جازعان. سوڭعى حاتىندا ءدال وسى ءۇش ەسىمدى كورسەتكەن»، – دەدى مارقۇمنىڭ اعاسى ءۋاليحان ءجۇسىپوۆ.
باسشىلىق تاراپىنان كورگەن قىسىم تۋرالى ەربول جاقىندارىنا بىرنەشە رەت ايتقان. جەتىگەن اسكەري قۇرىلىمىندا جۇمىس ىستەگىسى كەلمەگەندىكتەن، ءۇش اي بويى الماتىداعى باسقا بولىمگە اۋىسپاق بولىپتى. قۇجاتتارىن جيناعانىمەن، باسشىلارى قول قويماعان.
«ءبىز بورالدايداعى كادر بولىمىنە قوڭىراۋ شالدىق. ول «ماعان ەشتەڭە بايلانىستى ەمەس، باسشى قالاي دەيدى، سولاي بولادى» دەدى. قۇجاتتارىن دا وتكىزبەي قويعان. كەيىن وزىنەن سۇراماي، سىرتىنان سەرەبريانسكقا اۋىسۋ تۋرالى بۇيرىق شىعارعان»، – دەپ قوستى ءۋاليحان ءجۇسىپوۆ.
جاقىندارى وزىنە قول سالۋىنا دا وسى سەبەپ بولۋى مۇمكىن ەكەنىن العا تارتتى. بۇيرىق 6 قازاندا شىققان. ەربول مۇسابالانوۆ تا ءدال سول كۇنى وزىنە قول سالعان.
قايعىلى وقيعادان بىرنەشە كۇن بۇرىن مۇسابالانوۆ جاقىندارىنا اسكەري بولىمدەگى جەمقورلىق تۋرالى اقپارات ساقتالعان قاتتى ديسكتىڭ بارىن ايتىپتى. بۇل تۋرالى باسقا ادامدار دا بىلسە كەرەك. 11 قازاندا تۋىستارى تەرگەۋشىمەن بىرگە پاتەرىنە بارعاندا بارلىعى شاشىلىپ جاتقانىن كورگەن. سىرتقى بلوكتاعى ىزدەرگە قاراعاندا پاتەرگە بالكون ارقىلى كىرگەنىن اڭعارۋعا بولادى، دەيدى. ال قاتتى ديسك پاتەردە بولماعان.
«كەلىسىمشارت بويىنشا قىزمەت ەتكەن ەكىنشى ساناتتاعى سەرجانت ەربول مۇسابالانوۆتىڭ ولىمىنە قاتىستى قىلمىستىق كودەكستىڭ 201-بابى «ءوزىن ءوزى ولتىرۋگە دەيىن جەتكىزۋ» بويىنشا ءىس قوزعالدى. وزگە اقپارات تەرگەۋ مۇددەسىنە قاراي جاريا ەتۋگە جاتپايدى»، – دەدى قر قارۋلى كۇشتەرى اۋە قورعانىس كۇشتەرى باس قولباسشىسىنىڭ ورىنباسارى ءالىم يبراەۆ.
مارقۇمنىڭ جاقىندارى ءادىل تەرگەۋ ءجۇرىپ، ءىستىڭ بارلىق ءمان-جايى انىقتالۋىن تالاپ ەتەدى.
