Almatyda ózine qol salǵan ekinshi sanattaǵy serjant Erbol Musabalanovtyń týystary áskerıdiń ólimine kinálilerdi jazaǵa tartýdy talap etti. Óıtkeni, ol hatynda ólimine kináli úsh adamnyń atyn jazyp ketken, dep habarlaıdy “Adyrna” tilshisi «Informbıýro» baǵdarlamasyna silteme jasap.
Jaqyndary men dostary Erbol Musabalanovtyń naǵyz patrıot bolǵanyn aıtady. Ol áskerı qyzmetke 23 jylyn arnaǵan. Ólimine de shynshyldyǵy sebep bolýy múmkin deıdi týystary.
«Óz hatynda ol «Meniń ólimime Qabaqov, Ilııasovty, ekinshi sanattaǵy serjant Majıtovty kinálańdar» dep jazǵan. Sońǵy hatynda dál osy úsh esimdi kórsetken», – dedi marqumnyń aǵasy Ýálıhan Júsipov.
Basshylyq tarapynan kórgen qysym týraly Erbol jaqyndaryna birneshe ret aıtqan. Jetigen áskerı qurylymynda jumys istegisi kelmegendikten, úsh aı boıy Almatydaǵy basqa bólimge aýyspaq bolypty. Qujattaryn jınaǵanymen, basshylary qol qoımaǵan.
«Biz Boraldaıdaǵy kadr bólimine qońyraý shaldyq. Ol «Maǵan eshteńe baılanysty emes, basshy qalaı deıdi, solaı bolady» dedi. Qujattaryn da ótkizbeı qoıǵan. Keıin ózinen suramaı, syrtynan Serebrıanskqa aýysý týraly buıryq shyǵarǵan», – dep qosty Ýálıhan Júsipov.
Jaqyndary ózine qol salýyna da osy sebep bolýy múmkin ekenin alǵa tartty. Buıryq 6 qazanda shyqqan. Erbol Musabalanov ta dál sol kúni ózine qol salǵan.
Qaıǵyly oqıǵadan birneshe kún buryn Musabalanov jaqyndaryna áskerı bólimdegi jemqorlyq týraly aqparat saqtalǵan qatty dısktiń baryn aıtypty. Bul týraly basqa adamdar da bilse kerek. 11 qazanda týystary tergeýshimen birge páterine barǵanda barlyǵy shashylyp jatqanyn kórgen. Syrtqy bloktaǵy izderge qaraǵanda páterge balkon arqyly kirgenin ańǵarýǵa bolady, deıdi. Al qatty dısk páterde bolmaǵan.
«Kelisimshart boıynsha qyzmet etken ekinshi sanattaǵy serjant Erbol Musabalanovtyń ólimine qatysty Qylmystyq kodekstiń 201-baby «Ózin ózi óltirýge deıin jetkizý» boıynsha is qozǵaldy. Ózge aqparat tergeý múddesine qaraı jarııa etýge jatpaıdy», – dedi QR Qarýly kúshteri áýe qorǵanys kúshteri bas qolbasshysynyń orynbasary Álim Ibraev.
Marqumnyń jaqyndary ádil tergeý júrip, istiń barlyq mán-jaıy anyqtalýyn talap etedi.
