گرەممي سىيلىعىنىڭ يەگەرى، ديدجەي يمانبەك زەيكەنوۆ ستراتەگيالىق باستامالار فورۋمىندا (CSI Forum) قازاقستاندىق جاستاردىڭ دامۋى تۋرالى ايتتى، دەپ حابارلايدى “ادىرنا» ءتىلشىسى.
بۇگىن، 16 قاراشادا استانادا ستراتەگيالىق باستامالار فورۋمى باستالدى. وندا جوعارى لاۋازىمدى تۇلعالار، بەلگىلى بيزنەسمەندەر مەن الەمدىك ساراپشىلار ەل دامۋىنىڭ ماسەلەلەرىن تالقىلادى. ءىس-شارانىڭ اشىلۋىندا يمانبەك زەيكەنوۆ قازاقستاننىڭ بولاشاعىنىڭ بەينەسىن قالاي كورەتىنى تۋرالى ءوز پىكىرىمەن بولىسكەن بەينەروليك ۇسىنىلدى.
«مەن الەمنىڭ ءارتۇرلى ەلدەرىندە تۇرامىن جانە جۇمىس ىستەيمىن. ول جەرلەرگە بارعان جاقسى، بىراق ءۇي ودان دا جاقسىراق. قازاقستانعا، تۋعان جەرگە ورالعان كەزدە مەن ۇنەمى كەيبىر وزگەرىستەردى بايقايمىن جانە بۇل مەنى قۋانتادى. مەنىڭ ويىمشا، قازاقستان تۋرالى “بەيبىتشىلىك ورناتۋشى” دەپ ايتۋ ءۇشىن ەلىمىز بۇكىل الەمگە تانىمال جانە قۇرمەتتى بولۋى كەرەك. جەتى جىلدا ەل قالاي وزگەرەدى؟ مەنىڭشە، بۇل جاعدايدى قامتاماسىز ەتەتىن مۇمكىندىكتەر كەرەك.
مەنىڭ بايقاۋىمشا، ايماقتاردا تالانتتار كوپ. بۇل راس. سول تالانتتار دامىپ كەتۋى ءۇشىن ەلىمىز قانداي دا ءبىر شەشىم تابۋى كەرەك دەپ ويلايمىن. بىزدە Google, Facebook-تا جۇمىس ىستەيتىن اقىلدى جىگىتتەر وتە كوپ... ءبىزدىڭ IT ماماندارىمىز «ءمۇيىزى قاراعايداي» كومپانيالاردى قۇرا الادى دەپ سەنەمىن. جەتى جىلدان كەيىن قازاقستان وزگەرگەنىن قالايمىن. سوندا ءبىز، قازاقستاندىقتار ءوز وتانىمىزعا ورالعىمىز كەلەدى. سونىمەن قاتار شەتەلدىكتەر دە كەلىپ كورگىسى، ءومىر سۇرگىسى كەلەدى»، - دەدى يمانبەك.
سونداي-اق، يمانبەك اعا بۋىن جاستار ءۇشىن نە ىستەۋ كەرەك دەگەن ساۋالعا دا جاۋاپ بەردى.
"جاستارعا قىسىم جاساماڭدار، قالاماعانىن جاساۋعا ماجبۇرلەمەڭدەر. جىگىتتەرىمىز مادەنيەت پەن عىلىمدا ءبىراز جەتىستىكتەرگە جەتسىن دەسەڭدەر، قولدارىن شەشىڭدەر، تەك ولارعا كەدەرگى جاساماڭدار. مورالدىق ىلىمدەر مەن نۇسقاۋلار ولاردى تەك تىتىركەندىرەدى. ەگەر ولارعا كەڭەس كەرەك بولسا، وزدەرى كەلىپ، كەڭەس سۇرايدى»، - دەدى يمانبەك.
