اقش-تاعى دجوردجيا شتاتىنىڭ اتلانتا قالاسىندا تۇراتىن ستۋدەنت، الەمنىڭ 25 تىلىندە ەركىن سويلەيتىن پوليگلوت قىز قازاق جىگىتىنە جار بولۋدى ارماندايدى. بۇل جايلى امەريكالىق قىز "el.kz" پورتالىنا بەرگەن سۇحباتىنداعى اڭگىمە اراسىندا ورايىن كەلتىرىپ، ايتىپ قالدى. ونىڭ قازاق تىلىنە دەگەن قۇرمەتى "جۇرەگىمنىڭ يەسى دە قازاق جىگىتى بولسا ەكەن" دەگەن ارمانىنا جول اشقان. قىزدىڭ ەسىمى – كەمەرون. قازاقشا اتى – ايبالا. قازاق تىلىندە ەمىن-ەركىن سويلەيدى.
"El.kz"-ءتىڭ حابارلاۋىنشا، ونىڭ قازاق ەلىنە دەگەن ايرىقشا قىزىعۋشىلىعى قىزىلوردا قالاسىنان بالا اسىراپ الۋ ساپارى تۋرالى جازعان بىرەۋدىڭ كىتابىن وقىعاننان كەيىن ويانعان. قازاق تىلىنە جانە سالت-داستۇرىنە دەگەن ىقىلاسى ارتقان.
«وسى كىتاپتى وقىعاننان كەيىن الدىمدا ءبىر ماقسات تۇردى. قازاق ءتىلىن 2020 جىلدىڭ قاڭتارىندا ۇيرەندىم. بۇگىندە ەركىن سويلەي الامىن. ونلاين ارقىلى دا ۇيرەنۋگە بولادى. مەنىڭ ويىمشا، قازاق تىلىندە سويلەيتىندەر تۇركى حالىقتارىنىڭ ءتىلىن وڭاي ۇيرەنە الادى»، – دەيدى.
سونداي-اق، ول ءوزى مەڭگەرگەن 25 ءتىلدىڭ ىشىندە ءبىر-بىرىنە ۇقساس كەلەتىن ءتىلدى اتاپ ءوتتى. ياعني، ۇيرەنۋگە كەلگەندە قيىندىق سوقپاعانىن ايتتى.
«ۇقساس ءتىلدىڭ ىشىندە قازاق، ياكۋت، قىرعىز، وزبەك، ۇيعىر سياقتى تۇركى تىلدەرى بار. بىرەۋىن بىلسەڭىز، ەكىنشىسىن ۇيرەنۋ وتە وڭاي. ال ۇيرەنۋگە قيىندىق تۋدىرعان ءتىلدىڭ كەيبىرى ايتىلۋى، الفاۆيت جانە گرامماتيكا جاعىنان بولدى»، – دەدى ول.
امەريكالىق ستۋدەنت ءوزى سياقتى قاتارلاستارىنا ءتىل ۇيرەنۋ كەزىندە انا تىلىندە سويلەيتىندەرمەن ءجيى تاجىريبە الماسۋ اسا ماڭىزدى ەكەنىن ايتادى.
«سول ارقىلى وزگە ءتىلدى ۇيرەنۋدىڭ ءاردايىم پايداسى بار. قازاقستاندا تۇراتىن قازاقتار مىندەتتى تۇردە ءوز ءتىلىن ءبىلۋ قاجەت. ويتكەنى، قازاق ءتىلىنىڭ بايلىعى وتە كوپ. مەن ونى ءتىل ۇيرەنۋ بارىسىندا ءتۇسىندىم»، – دەيدى ايبالا.
ول قازاق ءتىلىن بىلسە دە، قازاقستانعا ءالى كەلىپ كورمەگەن ەكەن. الايدا بولاشاقتا قىزىلوردا نەمەسە سارىعاشتا تۇرعىسى كەلەدى.
«قازاق ءتىلىن بىلسەم دە، قازاق جەرىنە بارىپ كورمەدىم. الداعى ۋاقىتتا مىندەتتى تۇردە جوسپارلاپ وتىرمىن. سەبەبى قازاق دوستارىم وتە كوپ جانە قازاق ەلىن قاتتى قۇرمەتتەيمىن. مادەنيەتىنە، سالت-داستۇرىنە قىزىعامىن. تابيعاتى دا سۇلۋ. ءدامدى-تاعامى مەن قوناقجايلىعى ءبىر دە توبە»، – دەيدى پوليگلوت ستۋدەنت.
ايبالا بۇگىنگى تاڭدا يسلام ءدىنىن قابىلداعان جانە قازاق جىگىتىنە تۇرمىسقا شىعۋعا نيەتتى. ونى قازاق جىگىتتەرىنىڭ ءور تۇلعاسى مەن الىپ قاشۋ سياقتى سالت-ءداستۇر ەرەكشە قىزىقتىرادى ەكەن. بولاشاقتا قازاقتىڭ داستۇرىمەن توي جاساۋدى قالايدى.
امەريكالىق ستۋدەنت الەۋمەتتىك جەلىدە وتە بەلسەندى. قازاقشا ۆيدەوسىن كورگەن جەلى قولدانۋشىلارى وعان ريزاشىلىعىن ءبىلدىرىپ، اق تىلەگىن جاۋدىرتۋدا. «قازاقشاڭىز وتە جاقسى ەكەن»، «ەلىمىزدە تۇراتىن وزگە ۇلتتاردان جانە قازاقتاردان جاقسى سويلەيسىز»، «كەلسەڭ، كۇتىپ الامىز»، – دەپ جازۋدا جەلى قولدانۋشىلارى.
"ادىرنا" ۇلتتىق پورتالى
