الماتى وبلىسىندا "لەكسۋس" ماركالى كولىك قاعىپ كەتكەن وقۋشىلاردىڭ بىرەۋى كوز جۇمدى. بۇل تۋرالى وبلىستىق دەنساۋلىق ساقتاۋ باسقارماسى مالىمدەدى، دەپ حابارلايدى “ادىرنا” ۇلتتىق پورتالى.
"وكىنىشكە قاراي، دارىگەرلەردىڭ كورسەتكەن مەديتسينالىق كومەگىنە قاراماستان 10 جاسار ۇل بالا العان جاراقاتىنىڭ سالدارىنان كوز جۇمدى", – دەلىنگەن وبلىستىق دەنساۋلىق ساقتاۋ باسقارماسىنىڭ حابارلاماسىندا.
وقۋشىلاردىڭ ۇشەۋى تراۆماتولوگيا بولىمىندە ەم قابىلداپ جاتىر، جاعدايى ورتاشا اۋىر. ءتورتىنشى بالا اۋىر جاراقات الماعاندىقتان اۋرۋحاناعا جاتقىزىلماعان.
كولىك جۇرگىزۋشىسى ۇستالىپ، قاماۋعا الىندى. ءتيىستى سوت-مەديتسينالىق ساراپتاما تاعايىندالدى.
ايتا كەتەيىك، 25 قازان كۇنى بالالار جولدى جاياۋ جۇرگىنشىلەرگە ارنالماعان جەردەن كەسىپ وتپەك بولعان. Lexus كولىگى جولدان ءوتىپ بارا جاتقان 5 بالانى قاعىپ كەتكەن ەدى.
