قازاقستان مەكتەپتەرىندەگى وقۋشىلار سانى كەيىنگى 25 جىلداعى ەڭ جوعارى كورسەتكىشكە جەتتى، دەپ حابارلايدى "ادىرنا" ۇلتتىق پورتالى.
بۇل تۋرالى ۇلتتىق ستاتيستيكا بيۋروسى مالىمدەدى.
رەسمي دەرەككە سايكەس، 2025–2026 وقۋ جىلىن ەلىمىز بويىنشا 3,9 ميلليوننان استام وقۋشى اياقتاپ وتىر. وقۋشىلار سانى ەڭ كوپ وڭىرلەر قاتارىندا تۇركىستان وبلىسى، الماتى وبلىسى جانە الماتى قالاسى بار.
وقۋ-اعارتۋ مينيسترلىگىنىڭ مالىمەتىنشە، بيىل ءبىرىنشى سىنىپتا 389 مىڭنان استام بالا ءبىلىم العان. ەكىنشى سىنىپتا – 392 مىڭنان استام، ءۇشىنشى سىنىپتا – 404 مىڭنان استام وقۋشى تىركەلدى. ال ءتورتىنشى سىنىپتى شامامەن 391 مىڭ وقۋشى اياقتادى.
بەسىنشى سىنىپتا 373 مىڭنان استام بالا وقىسا، التىنشى سىنىپتا 401 مىڭنان استام وقۋشى ءبىلىم العان. جەتىنشى سىنىپتا 386 مىڭعا جۋىق ءجاسوسپىرىم تىركەلگەن. سەگىزىنشى سىنىپتا 354 مىڭنان استام، ال توعىزىنشى سىنىپتا 364 مىڭنان استام وقۋشى وقىدى.
ال ونىنشى سىنىپتا 232 مىڭنان استام وقۋشى ءبىلىم السا، 11-سىنىپتى 215 مىڭنان استام تۇلەك ءتامامدادى.
سونىمەن قاتار ەلىمىزدە 9 جانە 11-سىنىپتارعا ارنالعان قورىتىندى اتتەستاتسيا وتكىزۋ ءتارتىبى بەكىتىلدى. 9-سىنىپ وقۋشىلارى ءۇشىن ەمتيحاندار 29 مامىر مەن 11 ماۋسىم ارالىعىندا وتەدى. ولار ءتورت جازباشا ەمتيحان تاپسىرادى.
ال 11-سىنىپ تۇلەكتەرىنىڭ مەملەكەتتىك ەمتيحاندارى 2026 جىلعى 2–15 ماۋسىم ارالىعىنا جوسپارلانعان. تۇلەكتەر بەس ەمتيحان تاپسىرادى، ونىڭ بىرەۋى اۋىزشا فورماتتا وتەدى.
