سوڭعى جىلداردا ۇلتتىق قۇندىلىقتاردىڭ التى بەسىگىنە اينالعان اۋىل-ايماقتار جۇپىنى، كونتەرى تىرلىكتەن توزىپ بارادى. ماسەلەن، جامبىل وبلىسى، مويىنقۇم اۋداننان كەيىنگى 10 جىلدا 10 مىڭعا جۋىق ادام كوشىپ كەتكەن. تۇرعىنداردىڭ تۋعان جەرىن تاستاپ، ۇدەرە كوشۋىنە باستى سەبەپ - جۇمىسسىزدىق، دەپ حابارلايدى "ادىرنا" ۇلتتىق پورتالى.
مويىنقۇم اۋدانى جامبىل وبلىسىنىڭ تورتتەن ءبىر بولىگىن الىپ جاتىر. قازىر مۇنداعى حالىق سانى 28 مىڭ ادامنان ءسال اسادى.
"استانا" تەلەارناسىنىڭ حابارلاۋىنشا، كەيىنگى جىلدارى اۋدانداعى 24 ەلدى مەكەننىڭ بارلىعىندا تۇرعىن ازايعان. مىسالى، ميرنىي اۋىلىندا قازىر 675 ادام تۇرادى، كەيىنگى 3 جىلدا شاعىن عانا اۋىلدان 120 ادام كوشىپ كەتكەن. كوپ ءۇي بوس تۇر. ويتكەنى يەلەرى ساتا الماعاندىقتان تاستاپ كەتكەن.
بۇعان قاتىستى اۋدان اكىمشىلىگىنىڭ وكىلدەرى پىكىر ءبىلدىردى:
"كەيىنگى 11 جىلدا حالىق سانى ازايعان. جالپى ازايۋى اۋدانداعى سوڭعى جىلداعى ميرنىي، اقسۇيەك ەلدىمەكەندەرىندەگى "شىعىس كەنت", "باتىس كەنت" ءوندىرۋ باسقارمالارىنىڭ، ۋران شىعاراتىن ءىرى كاسىپورىنداردىڭ جابىلۋى اسەر ەتكەن", - دەدى مويىنقۇم اۋدانى اكىمىنىڭ ورىنباسارى ءسابيت تولەگەنوۆ.
تۇرعىنداردىڭ مۇنداي قادامعا بارۋى - ەركىنەن تىس. ولار اۋىلدا تۇراقتى جۇمىس تابا الماي، ناپاقا تابۋ جولىندا قالاعا قونىس اۋدارىپ جاتىر.
"ادىرنا" ۇلتتىق پورتالى
