تارازدا قالانى تازالايتىن ازاماتتارعا كۇل-قوقىس جيناپ، كوشە سىپىرۋعا ارنالعان قاراپايىم قۇرال-جابدىقتار جەتىسپەيدى. بارىنىڭ ءوزى ءبۇتىن ەمەس. بۇل تۋرالى “ينفورمبيۋرو” باعدارلاماسى جاريالادى، دەپ حابارلايدى “ادىرنا” ۇلتتىق پورتالى.
جۇمىسشىلاردىڭ ايتۋىنشا، ءبىر كۇرەككە ون ادام تالاسسا، ءتىسى جوق تىرمانىڭ ورنىنا ساۋساقتارىمەن جەر تىرمالاپ ءجۇر ەكەن. قاپ بەرىلمەي قوقىستى قالتامىزعا سالامىز دەيدى.
ءبىر اربادا تۇرعان ەكى كۇرەك، ءۇش تىرما، ءبىر سىپىرعىش بۇكىل جەڭىس ساياباعىنا بولىنگەن قۇرال. ال جۇمىسقا ەلۋ ادام جۇمىلدىرىلعان. بىراق كوبى ادام قاراسىن كوبەيتىپ قۇر ءجۇر. جالقاۋلىقتان ەمەس جاعدايدىڭ جوقتىعىنان. سىپىرا-سىپىرا سابى قالعان سىپىرعىش، ءتىسى كەتىك تىرما، سىنىق كۇرەك، توزعان تەحنيكانى باسشىلىققا تالاي ايتتىق دەيدى جۇمىسشىلار. الايدا وزگەرگەن دانەڭە جوق بولسا دا، مۇنتازداي تازالىقتى تالاپ ەتۋ وزگەرمەپتى. قوعامدىق جۇمىسشىلار تارازعا استانادان مارتەبەلى مەيمانداردىڭ ءجيى كەلۋىن تىلەيدى. ويتكەنى سول كۇنى سۋ جاڭا قۇرال-سايماندى بولىپ قالامىز دەيدى.
“بىراق كەشە پرەزيدەنت كەلگەن كەزىندە ءبىز العانبىز. 15 تاچكا، 10 شاقتى كۇرەك. پرەزيدەنت ساياباعى، كونە تاراز ارباتى سياقتى ايماقتارعا بولىنگەن”، – دەيدى "جاسىل ەل" جشس دەمالىس ورىندارى جانە كوشە تازالىعىن ساقتاۋ مەڭگەرۋشىسى ارايلىم ارىستانوۆا.
سوەداي-اق، جۇمىسشىلار بازادا ەشقانداي جاعداي جاسالماعانىنا دا قاپالى.
“بازاسىندا جاعداي جاسالماعان. شاتىرى جوق. توزىپ تۇر. تەحنيكالاردىڭ ءبارى دالادا تۇرادى. مۋسوروۆوز ايدايمىن. قازىر رەمونتتى كۇتىپ تۇرمىن. وسىلاي تۇرعانىما ءبىر اي بولدى. بىزگە قوسالقى بولشەكتەردى ۋاقىتى اكەلمەيدى”، – دەيدى جايدار قايىربەكوۆ.
جىلارمان جاعدايىن ايتقان جۇمىسشىلارعا باسشىلىق مەكەمەنىڭ ودان بەتەر بار ماسەلەسىن ايتىپ شەر تارقاتتى. ايتۋىنشا، سوڭعى ءتورت جىلدا جۇمىسشىلارعا جالاقىدان ۇستالاتىن الەۋمەتتىك تولەمنىڭ ءبىر تيىنى دا تولەنبەگەن. مەكەمە قارىزعا بەلشەسىنەن باتقان. ءتىپتى ەسەپشوتى بۇعاتتالىپ، بۇگىندە سوت شەشىمىمەن وڭالتۋ جاعدايىندا تۇر. وسىلايشا بۇرىنعى باسشىلىقتىڭ بىلىعىن بىرتىندەپ شەشۋدەمىز دەيدى.
“جوسپارىمىز بويىنشا 3-ءشى كۆارتالعا دەيىن ءبىز تولىق جابۋىمىز كەرەك. ءبىرىنشى ورىندا سالىق، الەۋمەتتىك پاكەت دەيدى، زەيناتاقى اۋدارۋ دەيدى، مەديتسينالىق ساقتاندىرۋ دەيدى سونىڭ ءبارىن بەرەمىز دەپ جوسپارعا كىرگىزدىك. قالالىق قارجى بولىمىمىمەن بەكىتىپ العانبىز”، – دەيدى "جاسىل ەل-تاراز" جشس ديرەكتورى ازامات ءابىشوۆ.
ال قۇرال-سايمان ماسەلەسى بويىنشا مەملەكەتتىك ساتىپ الۋ زاڭىنا سايكەس كونكۋرس ەندى ويناتىلىپتى. تۋرا ماعىناسىندا ەكى قولعا ءبىر كۇرەك تاپپاعان جۇمىسشىلار ەندى ءسال شىداسا، ءبارىن بۇتىندەيمىز دەپ سەندىردى.
