"Tyrma joq, sausaqpen tazalaimyz": Tarazda qala tazalyqşylary eŋbek jaǧdaiynyŋ jasalmaǧanyna narazy

Tarazda qalany tazalaityn azamattarǧa kül-qoqys jinap, köşe sypyruǧa arnalǧan qarapaiym qūral-jabdyqtar jetıspeidı. Barynyŋ özı bütın emes. Būl turaly  “İnformbiuro” baǧdarlamasy jariialady, dep habarlaidy “Adyrna” ūlttyq portaly.

Jūmysşylardyŋ aituynşa, bır kürekke on adam talassa, tısı joq tyrmanyŋ ornyna sausaqtarymen jer tyrmalap jür eken. Qap berılmei qoqysty qaltamyzǧa salamyz deidı.

Bır arbada tūrǧan ekı kürek, üş tyrma, bır sypyrǧyş bükıl Jeŋıs saiabaǧyna bölıngen qūral. Al jūmysqa elu adam jūmyldyrylǧan. Bıraq köbı adam qarasyn köbeitıp qūr jür. Jalqaulyqtan emes jaǧdaidyŋ joqtyǧynan. Sypyra-sypyra saby qalǧan sypyrǧyş, tısı ketık tyrma, synyq kürek, tozǧan tehnikany basşylyqqa talai aittyq deidı jūmysşylar. Alaida özgergen däneŋe joq bolsa da, mūntazdai tazalyqty talap etu özgermeptı. Qoǧamdyq jūmysşylar Tarazǧa Astanadan märtebelı meimandardyŋ jiı keluın tıleidı. Öitkenı sol künı su jaŋa qūral-saimandy bolyp qalamyz deidı.

“Bıraq keşe Prezident kelgen kezınde bız alǧanbyz. 15 tachka, 10 şaqty kürek. Prezident saiabaǧy, Köne Taraz arbaty siiaqty aimaqtarǧa bölıngen”, – deidı "Jasyl El" JŞS demalys oryndary jäne köşe tazalyǧyn saqtau meŋgeruşısı Arailym Arystanova. 

“Bazasynda jaǧdai jasalmaǧan. Şatyry joq. Tozyp tūr. Tehnikalardyŋ bärı dalada tūrady. Musorovoz aidaimyn. Qazır remontty kütıp tūrmyn. Osylai tūrǧanyma bır ai boldy. Bızge qosalqy bölşekterdı uaqyty äkelmeidı”, – deidı Jaidar Qaiyrbekov. 

Jylarman jaǧdaiyn aitqan jūmysşylarǧa basşylyq mekemenıŋ odan beter bar mäselesın aityp şer tarqatty. Aituynşa, soŋǧy tört jylda jūmysşylarǧa jalaqydan ūstalatyn äleumettık tölemnıŋ bır tiyny da tölenbegen. Mekeme qaryzǧa belşesınen batqan. Tıptı esepşoty būǧattalyp, bügınde sot şeşımımen oŋaltu jaǧdaiynda tūr. Osylaişa būrynǧy basşylyqtyŋ bylyǧyn bırtındep şeşudemız deidı.

“Josparymyz boiynşa 3-şı kvartalǧa deiın bız tolyq jabuymyz kerek. Bırınşı orynda salyq, äleumettık paket deidı, zeinataqy audaru deidı, medisinalyq saqtandyru deidı sonyŋ bärın beremız dep josparǧa kırgızdık. Qalalyq qarjy bölımımımen bekıtıp alǧanbyz”, – deidı "Jasyl El-Taraz" JŞS direktory Azamat Äbışov.

Al qūral-saiman mäselesı boiynşa memlekettık satyp alu zaŋyna säikes konkurs endı oinatylypty. Tura maǧynasynda ekı qolǧa bır kürek tappaǧan jūmysşylar endı säl şydasa, bärın bütındeimız dep sendırdı.