رەسەيدىڭ ورىنبور قالاسى كوممۋنالدىق قىزمەتتەرگە سولتۇستىك كورەيادان جۇمىسشىلار تارتۋعا ارەكەتتەنگەن. الايدا ۇسىنىلعان جالاقىنىڭ تومەندىگىنە بايلانىستى بۇل باستاما جۇزەگە اسپاعان. بۇل تۋرالى ورىنبور قالاسىنىڭ اكىمى البەرت يۋماديلوۆ 1743.ru پورتالىنا بەرگەن سۇحباتىندا ايتتى، دەپ حابارلايدى “ادىرنا”.
يۋماديلوۆتىڭ سوزىنشە، ول 2025 جىلى سولتۇستىك كورەيادان جۇمىس كۇشىن تارتۋ ماسەلەسىمەن اينالىسقان. بىراق بۇل باستاما ناتيجە بەرمەگەن.
«بىلگەنىمدەي، سولتۇستىك كورەيانىڭ جۇمىسشىلارى 55 مىڭ رۋبل جالاقىعا كەلمەيدى. ولاردا جالاقى دەڭگەيى بۇدان ەكى-ءۇش ەسە جوعارى. ولار روبوت سەكىلدى جۇمىس ىستەيدى، ونى ءوز كوزىممەن كوردىم. بىراق ءبىز ونداي جالاقى تولەي المايمىز»، – دەدى قالا اكىمى.
ول رەسەيدىڭ كەيبىر وڭىرلەرى سولتۇستىك كورەيامەن ەڭبەك سالاسىندا كەلىسىم جاساسقانىن، الايدا ورىنبور وبلىسى ولاردىڭ قاتارىنا كىرە الماعانىن ايتتى.
سونىمەن قاتار، ورىنبورعا سەنەگالدان ەڭبەك ميگرانتتارىن تارتۋ مۇمكىن بولعان. قالا اكىمىنىڭ ايتۋىنشا، العاشقى 10 سەنەگالدىق جۇمىسشى ءساۋىر ايىندا كەلگەن. قازىر كوممۋنالدىق قىزمەتتەردە سەنەگالدان كەلگەن 31 ازامات ەڭبەك ەتىپ ءجۇر.
يۋماديلوۆ سەنەگالدىق اۋلا سىپىرۋشىلاردىڭ جۇمىسىنا كوڭىلى تولاتىنىن ايتىپ، ولاردىڭ دەمالىس كۇندەرى دە جۇمىس ىستەۋگە دايىن ەكەنىن ءارى ۇسىنىلعان جالاقىعا كەلىسەتىنىن جەتكىزدى.
«ولاردىڭ جەكسەنبى كۇنى دە جۇمىس ىستەپ جۇرگەنىن كورىپ ءجۇرمىن. بۇعان دەيىن سەنبى-جەكسەنبى كۇندەرى ەشكىم جۇمىس ىستەمەيتىن. مىسالى، وسى دەمالىستا ءبىز بالالار لاگەرلەرىنە باراتىن جولداردى تازالاپ جاتىرمىز. بۇل وتە اۋىر جۇمىس، اسىرەسە "دۋبكي" ماڭىنداعى اۋماقتار قالىڭ ءشوپ باسقان. ەگەر مۇنى مەردىگەرلەرگە تاپسىرساق، شامامەن ءۇش ميلليون رۋبل جۇمسار ەدىك. ال قازىر بۇل جۇمىستى 20 جىگىت اتقارىپ جاتىر جانە جاقسى ناتيجەگە قول جەتكىزۋدە»، – دەدى ول.
