جامبىلدا ءاز-ناۋرىز مەرەكەسىنە ارنالعان ءىس-شارالار باستالدى

2627
Adyrna.kz Telegram

جامبىل وبلىسىندا ۇلىستىڭ ۇلى كۇنى ءاز-ناۋرىز مەرەكەسىن تويلاۋ باستالدى. وبلىس ورتالىعىنان بولەك بارلىق قالا، اۋدانداردا دا ءتۇرلى ءىس-شارالار ۇيىمداستىرىلىپ، كوكتەم مەرەكەسى لايىقتى تۇردە اتاپ وتىلۋدە.

امال مەرەكەسىنە وراي بۇگىن ا. توقپانوۆ اتىنداعى وبلىستىق قازاق دراما تەاترىندا «تورتكۇل حانزاداسى» ەرتەگىسى جانە «ناۋرىز دۋمان» بالالارعا ارنالعان قويىلىمنىڭ پرەمەراسى ءوتتى.

اقىن سانتورە ءپىرمانوۆتىڭ تاريحي اڭىز نەگىزىندە ساحانالانعان «تورتكۇل حانزاداسى» ەرتەگىسىندە قازىرگى تاراز قالاسىنىڭ اۋماعىندا ورنالاسقان «تورتكۇل» كونە قالاشىعىندا بولعان وقيعا باياندالادى. وقيعادا ەل بيلەۋشىسى – حاننىڭ ۇلى حانزادانىڭ ەل باسقارۋدى قولىنا العانداعى جانە وزىنە جار تاڭداۋداعى ءدۇيىم جۇرتتى تاڭ قالدىرعان تاپقىرلىعى، اقىل-پاراساتى ۇتىمدى سۋرەتتەلەدى.

ەرتەگى-قويىلىم جاس كورەرمەندەر مەن بۇلدىرشىندەردى تۋعان ەلى مەن جەرىن، وتاندى  سۇيۋگە تاربيەلەپ، اتا-بابا اماناتىنا بەرىك بولۋعا شاقىرادى.

بۇدان سوڭ قويىلىمنان ادەمى اسەر العان بالالارعا «ناۋرىز دۋمان» مەرەكەلىك شاراسى ۇيىمداستىرىلدى. مۇندا قىدىر اتا، ۇماي انا، ناۋرىزبەك، كۇن، ءتۇن، اقپان-توقپان كەيىپكەرلەرى كىشكەنتاي كورەرمەندەردىڭ كوڭىلىن باۋراپ، تابيعاتتىڭ تاماشا كورىنىستەرىمەن قىزىقتىردى.

مەرەكەلىك شارا ءان-بيمەن كومكەرىلىپ، بىرلىك پەن بەرەكە ۇعىمدارىنىڭ ءمان-ماڭىزىن ايشىقتاي ءتۇستى.

ناۋرىز مەرەكەسىنە ارنالعان ءتۇرلى دەڭگەيدە شارالاردى ۇيىمداستىرۋ قالا، اۋدانداردا دا جالعاسۋدا.

"ادىرنا" ۇلتتىق پورتالى

پىكىرلەر