تۇركيا پرەزيدەنتى رەجەپ تايىپ ەردوعان مەملەكەت باسشىسى قاسىم-جومارت توقاەۆقا العىس حات جولدادى، - دەپ حابارلايدى "ادىرنا" ءتىلشىسى اقوردانىڭ ءباسپاسوز قىزمەتىنە سىلتەمە جاساپ.
ءوز حاتىندا ەردوعان تۇرىك حالقىنىڭ اتىنان جانە جەكە اتىنان مەملەكەت باسشىسى قاسىم-جومارت توقاەۆقا تۇركيانىڭ كاحرامانماراش پروۆينتسياسى مەن باسقا ەلدى مەكەندەرىنە وراسان زور شىعىن اكەلگەن جويقىن جەر سىلكىنىسىنە بايلانىستى كوڭىل ايتقانى ءۇشىن العىس ايتتى. سونداي-اق باۋىرلاس ەلگە شۇعىل كومەك كورسەتكەنى ءۇشىن راقمەتىن ءبىلدىردى.
"تابيعي اپات كەزىندە دوس ەلدەردىڭ ىنتىماقتاستىعى بىزگە بارلىق قيىندىقتارعا توتەپ بەرۋگە كۇش بەرەدى. قازاقستاننىڭ كومەگى جەر سىلكىنىسىنىڭ اۋىر زارداپتارىمەن كۇرەسۋدە حالقىمىزعا ۇلكەن قولداۋ بولدى. ءبىز قۇتقارۋدى ريزاشىلىقپەن ەسكە الامىز جانە ءۇيىندى استىندا قالعان ادامداردى قۇتقارۋدا جانقيارلىق پەن باتىلدىق تانىتقان ىزدەستىرۋ توبىنا العىسىمىز شەكسىز»، - دەلىنگەن حاتتا.
"ادىرنا" ۇلتتىق پورتالى
