جاڭاوزەن قالاسىندا «قازمۇنايگاز» ۇك اق (قمگ) ارنايى جۇمىس توبىنىڭ «وزەنمۇنايگاز» (ومگ) جانە قالانىڭ مۇناي سەرۆيس كاسىپورىندارىنىڭ قىزمەتىن تەكسەرۋ بويىنشا جۇمىسى جالعاسىپ جاتىر.
قازىرگى ۋاقىتتا ماماندار ءبىر ءتيپتى سۋ جىلىتۋ قوندىرعىلارىن قايتا جاڭارتۋ كەزىندە جۇمىس قۇنى اراسىنداعى ايتارلىقتاي ايىرماشىلىقتى انىقتادى. ماسەلەن، 3 سۋ جىلىتۋ قوندىرعىسىن (ۆگۋ-1 نگدۋ-3) قايتا جاڭارتۋدىڭ جالپى قۇنى قوسىلعان قۇن سالىعىمەن بىرگە 525 ملن 482 مىڭ تەڭگە بولعان، ال ءبىر عانا قوندىرعىنى (ۆگۋ-3ا-س نگدۋ-1) قايتا جاڭارتۋ قۇنى قوسىلعان قۇن سالىعىمەن بىرگە 380 ميلليون تەڭگەدەن اسىپ كەتكەن. بۇل – وسىعان ۇقساس نگدۋ-3 قوندىرعىسىن جوندەۋدەن 2 ەسە قىمبات. مۇنداي ۇلكەن ايىرماشىلىقتىڭ سەبەپتەرىن ماماندار انىقتاپ جاتىر.
سونداي-اق ساتىپ الۋ قىزمەتىن باسقارۋ ستاندارتىنا سايكەس، ومگ مەن «بەرالى ماڭعىستاۋ Company» جشس اراسىندا 2022 جىلى جالپى سوماسى 2 ملرد 582 ملن 699 مىڭ تەڭگەگە ۇڭعىمالاردى جەراستى جوندەۋ جۇمىستارىنا كەلىسىمشارتتار جاسالعان، جۇمىستىڭ جالپى كولەمى – 371 ۇڭعىمانى جەراستى جوندەۋ (نەمەسە 30 040,7 بريگادا-ساعات).
تەكسەرۋ بارىسىندا ومگ بيۋدجەت كودەكسىنىڭ 97-بابىنىڭ 6-1 تارماعىن بۇزعانى، اتاپ ايتقاندا جالپى سوماسى 26 ملن 951 مىڭ تەڭگەگە تەڭ، جۇمىس ۋاقىتى 300 ساعاتقا ارتىق كورسەتىلگەن ورىندالعان جۇمىس اكتىلەرىن قابىلداعانى انىقتالدى. سونىمەن قاتار، ورىندالماعان جۇمىس كولەمى بەلگىلى بولدى. سەبەپتەرى ناقتىلانىپ جاتىر.
جۇمىس توبى ومگ «سامۇرىق-قازىنا» ۇاق اق ساتىپ الۋ ءتارتىبىنىڭ نورمالارىن ساقتاماي، 2022 جىلدىڭ جەلتوقسانىنان 2023 جىلدىڭ قاڭتارىنا دەيىن جانە 2023 جىلدىڭ ناۋرىزدان باستاپ قازىرگى ۋاقىتقا دەيىن اي-95 ماركالى بەنزيندى جۇرگىزۋشىلەردىڭ جالاقى الاتىن كارتالارىنا قاراجات اۋدارۋ ارقىلى ساتىپ الىپ كەلگەنىن انىقتادى.
سونداي-اق، بيىل قاڭتاردا ومگ ساتىپ الۋ ءتارتىبىن بۇزا وتىرىپ، كۇندەلىكتى جانە (نەمەسە) اپتا سايىن قاجەت تاۋارلار، جۇمىستار مەن قىزمەتتەردى ساتىپ الۋعا بەكىتىلگەن تىزبەسىز كولەمى 69 توننا اي-95 ماركالى بەنزين ساتىپ العان.
