Jańaózen qalasynda «QazMunaıGaz» UK AQ (QMG) arnaıy jumys tobynyń «Ózenmunaıgaz» (ÓMG) jáne qalanyń munaı servıs kásiporyndarynyń qyzmetin tekserý boıynsha jumysy jalǵasyp jatyr.
Qazirgi ýaqytta mamandar bir tıpti sý jylytý qondyrǵylaryn qaıta jańartý kezinde jumys quny arasyndaǵy aıtarlyqtaı aıyrmashylyqty anyqtady. Máselen, 3 sý jylytý qondyrǵysyn (VGÝ-1 NGDÝ-3) qaıta jańartýdyń jalpy quny qosylǵan qun salyǵymen birge 525 mln 482 myń teńge bolǵan, al bir ǵana qondyrǵyny (VGÝ-3a-S NGDÝ-1) qaıta jańartý quny qosylǵan qun salyǵymen birge 380 mıllıon teńgeden asyp ketken. Bul – osyǵan uqsas NGDÝ-3 qondyrǵysyn jóndeýden 2 ese qymbat. Mundaı úlken aıyrmashylyqtyń sebepterin mamandar anyqtap jatyr.
Sondaı-aq satyp alý qyzmetin basqarý standartyna sáıkes, ÓMG men «BerÁli Mańǵystaý Company» JShS arasynda 2022 jyly jalpy somasy 2 mlrd 582 mln 699 myń teńgege uńǵymalardy jerasty jóndeý jumystaryna kelisimsharttar jasalǵan, jumystyń jalpy kólemi – 371 uńǵymany jerasty jóndeý (nemese 30 040,7 brıgada-saǵat).
Tekserý barysynda ÓMG Bıýdjet kodeksiniń 97-babynyń 6-1 tarmaǵyn buzǵany, atap aıtqanda jalpy somasy 26 mln 951 myń teńgege teń, jumys ýaqyty 300 saǵatqa artyq kórsetilgen oryndalǵan jumys aktilerin qabyldaǵany anyqtaldy. Sonymen qatar, oryndalmaǵan jumys kólemi belgili boldy. Sebepteri naqtylanyp jatyr.
Jumys toby ÓMG «Samuryq-Qazyna» UÁQ AQ satyp alý tártibiniń normalaryn saqtamaı, 2022 jyldyń jeltoqsanynan 2023 jyldyń qańtaryna deıin jáne 2023 jyldyń naýryzdan bastap qazirgi ýaqytqa deıin AI-95 markaly benzındi júrgizýshilerdiń jalaqy alatyn kartalaryna qarajat aýdarý arqyly satyp alyp kelgenin anyqtady.
Sondaı-aq, bıyl qańtarda ÓMG satyp alý tártibin buza otyryp, kúndelikti jáne (nemese) apta saıyn qajet taýarlar, jumystar men qyzmetterdi satyp alýǵa bekitilgen tizbesiz kólemi 69 tonna AI-95 markaly benzın satyp alǵan.
