سىبايلاس جەمقورلىققا قارسى قىزمەت «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ استانا قالاسى بويىنشا مامانداندىرىلعان دەپارتامەنتىنىڭ ۇيىمداسقان توبىنا جانە ازاماتتىق تۇلعالارعا قاتىستى سوتقا دەيىنگى تەرگەۋدى اياقتادى، - دەپ حابارلايدى "ادىرنا" پورتالى.
ۆەدومستۆونىڭ مالىمەتىنشە، قىلمىستىق ءىس «SC Web-Module» جانە «حقكو ياج» اقپاراتتىق جۇيەلەرىنە كولىك قۇرالدارى تۋرالى مالىمەتتەردى زاڭسىز ەنگىزۋ جانە جويۋ، مامىلەلەردىڭ جازباشا نىساندارىن بۇرمالاۋ فاكتىلەرى بويىنشا تەرگەلدى.
"قىلمىستىق توپ 2022 جىلدىڭ قاڭتار-مامىر ارالىعىندا زاڭدا بەلگىلەنگەن الىمدار مەن تولەمدەردى تولەمەي، شەتەلدەن اكەلىنگەن 475 اۆتوكولىكتى زاڭسىز تىركەگەنى انىقتالدى. وسىعان بايلانىستى مەملەكەتكە 1,4 ملرد. تەڭگە سوماسىندا اسا ءىرى كولەمدە زالال كەلتىرىلگەن.
بارلىعى 30 ادام قىلمىس جاسادى دەگەن كۇدىككە ىلىنگەن. ولاردىڭ قاتارىندا استاناداعى No2 ارناۋلى حالىققا قىزمەت كورسەتۋ ورتالىعىنىڭ باسشىسى، ءتورت پوليتسيا قىزمەتكەرى مەن كولىكتەردى زاڭسىز تىركەۋدە ءوز قىزمەتتەرىن ۇسىنعان دەلدالدار بار. قازىرگى ۋاقىتتا قىلمىستىق ءىس ماتەريالدارى تەكسەرىلۋدە»، - دەدى انتيكور.
سىبايلاس جەمقورلىققا قارسى قىزمەت قازاقستاندىقتاردى اۆتوكولىكتەردى تىركەۋ كەزىندە دەلدالداردىڭ قىزمەتىن پايدالانباۋعا شاقىرادى.
ەسكە سالايىق، 2022 جىلدىڭ تامىزىندا سىبايلاس جەمقورلىققا قارسى قىزمەت ارنايى حقكو قىزمەتكەرلەرى مەن پوليتسيا قىزمەتكەرلەرى كولىكتەردى تىركەۋ كەزىندە زاڭسىز بايۋ سحەماسىن پايدالانعانىن مالىمدەگەن. انتيكوردىڭ ايتۋىنشا، استانادا دا وسىنداي سحەما توقتاتىلدى.
"ادىرنا" ۇلتتىق پورتالى
