التاي كولگىنوۆ پرەمەر-ءمينيستردىڭ ورىنباسارى قىزمەتىنەن بوساتىلدى. بۇل تۋرالى پرەزيدەنتتىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
«مەملەكەت باسشىسىنىڭ جارلىعىمەن التاي سەيدىرۇلى كولگىنوۆ قازاقستان رەسپۋبليكاسى پرەمەر-ءمينيسترىنىڭ ورىنباسارى لاۋازىمىنان بوساتىلدى»،—دەلىنگەن حابارلامادا.
ايتا كەتەيىك، ول بۇل قىزمەتكە 2022 جىلدىڭ جەلتوقسانىندا تاعايىندالعان ەدى.
بۇعان دەيىن كولگىنوۆ استانا اكىمى بولىپ تۇرعاندا قالانىڭ سۋ ماسەلەسىن شەشۋ ءۇشىن ءبىراز جۇمىس جاساعانىن العا تارتىپ، وزىنە تاعىلعان ايىپتاردى جوققا شىعاردى.
«استاناداعى كەيبىر جەرلەردە سۋ تاپشىلىعى بار. مەن تۇراتىن تۇرعىن ۇيدە سۋ بار. الماتى اۋدانىنداعى كوپقاباتتى ۇيدە تۇرامىن»،—دەدى ول.
ال كۇنى كەشە مەملەكەت باسشىسى قاسىم-جومارت توقاەۆ ەلوردا اكىمى جەڭىس قاسىمبەكتىڭ سۋ تاپشىلىعى جاعدايى تۋرالى ەسەبىن تىڭداپ، ماسەلەنى جەدەل شەشۋدى تاپسىردى.
التاي سەيدىرۇلى 1978 جىلى دۇنيەگە كەلگەن. ول ا.ياساۋي اتىنداعى حالىقارالىق قازاق-تۇرىك ۋنيۆەرسيتەتىن، قازاقستان رەسپۋبليكاسى پرەزيدەنتى جانىنداعى مەملەكەتتىك باسقارۋ اكادەمياسىن، «بولاشاق» باعدارلاماسى بويىنشا ۇلىبريتانيانىڭ ابەردين ۋنيۆەرسيتەتىن بىتىرگەن. مەملەكەتتىك جانە جەرگىلىكتى باسقارۋ ماگيسترى، حالىقارالىق كوممەرتسيالىق قۇقىق ماگيسترى.
2000 جىلى قازاقستان رەسپۋبليكاسىنىڭ قارۋلى كۇشتەرىندە قىزمەت ەتكەن.
2001-2008 جىلدارى قازاقستان رەسپۋبليكاسى ادىلەت مينيسترلىگى، مەملەكەتتىك قىزمەت ىستەرى اگەنتتىگى جانە باس پروكۋراتۋرا ورگاندارىندا ءار ءتۇرلى لاۋازىمدا قىزمەت اتقارادى.
2008-2010 جىلدارى - «الاشمەدياگرۋپپ» جشس باس ديرەكتورىنىڭ ورىنباسارى.
2010-2012 جىلدارى قازاقستان رەسپۋبليكاسى پرەزيدەنتى اكىمشىلىگىنىڭ ايماقتىق-ۇيىمداستىرۋ جانە مەملەكەتتىك باقىلاۋ جۇمىستارى ءبولىمىنىڭ مەملەكەتتىك ينسپەكتورى قىزمەتىن اتقاردى.
2012-2013 جىلدارى باتىس قازاقستان وبلىسى اكىمىنىڭ ورىنباسارى.
2013-2016 جىلدارى ورال قالاسىنىڭ اكىمى قىزمەتىندە بولدى.
2016 جىلدىڭ 26 ناۋرىزىنان باتىس قازاقستان وبلىسىنىڭ اكىمى قىزمەتىن اتقاردى.
2019-2022 جىلدارى استانا قالاسىنىڭ اكىمى قىزمەتىن اتقاردى.
