Altai Kölgınov Premer-Ministrdıŋ orynbasary qyzmetınen bosatyldy. Būl turaly Prezidenttıŋ baspasöz qyzmetı jazdy, dep habarlaidy «Adyrna» tılşısı.
«Memleket basşysynyŋ Jarlyǧymen Altai Seidırūly Kölgınov Qazaqstan Respublikasy Premer-Ministrınıŋ orynbasary lauazymynan bosatyldy»,—delıngen habarlamada.Aita keteiık, ol būl qyzmetke 2022 jyldyŋ jeltoqsanynda taǧaiyndalǧan edı.
Būǧan deiın Kölgınov Astana äkımı bolyp tūrǧanda qalanyŋ su mäselesın şeşu üşın bıraz jūmys jasaǧanyn alǧa tartyp, özıne taǧylǧan aiyptardy joqqa şyǧardy.
«Astanadaǧy keibır jerlerde su tapşylyǧy bar. Men tūratyn tūrǧyn üide su bar. Almaty audanyndaǧy köpqabatty üide tūramyn»,—dedı ol.
Al künı keşe Memleket basşysy Qasym-Jomart Toqaev elorda äkımı Jeŋıs Qasymbektıŋ su tapşylyǧy jaǧdaiy turaly esebın tyŋdap, mäselenı jedel şeşudı tapsyrdy.
Altai Seidırūly 1978 jyly düniege kelgen. Ol A.Iаsaui atyndaǧy halyqaralyq qazaq-türık universitetın, Qazaqstan Respublikasy Prezidentı janyndaǧy memlekettık basqaru akademiiasyn, «Bolaşaq» baǧdarlamasy boiynşa Ūlybritaniianyŋ Aberdin universitetın bıtırgen. Memlekettık jäne jergılıktı basqaru magistrı, halyqaralyq kommersiialyq qūqyq magistrı. 2000 jyly Qazaqstan Respublikasynyŋ Qaruly küşterınde qyzmet etken. 2001-2008 jyldary Qazaqstan Respublikasy Ädılet ministrlıgı, Memlekettık qyzmet ısterı Agenttıgı jäne Bas prokuratura organdarynda är türlı lauazymda qyzmet atqarady. 2008-2010 jyldary - «AlaşMediaGrupp» JŞS bas direktorynyŋ orynbasary. 2010-2012 jyldary Qazaqstan Respublikasy Prezidentı Äkımşılıgınıŋ aimaqtyq-ūiymdastyru jäne memlekettık baqylau jūmystary bölımınıŋ memlekettık inspektory qyzmetın atqardy. 2012-2013 jyldary Batys Qazaqstan oblysy äkımınıŋ orynbasary. 2013-2016 jyldary Oral qalasynyŋ äkımı qyzmetınde boldy. 2016 jyldyŋ 26 nauryzynan Batys Qazaqstan oblysynyŋ äkımı qyzmetın atqardy. 2019-2022 jyldary Astana qalasynyŋ äkımı qyzmetın atqardy.Ūqsas jaŋalyqtar
