شىمكەنتتە اسكەري قىزمەتكەر كوز جۇمدى

“شىمكەنتتەگى اسكەري بولىمدە وقىس وقيعا بولدى. وفيتسەر ءولىمى تىركەلدى”، دەپ حابارلايدى “ادىرنا”. شىمكەنتتە 2 اسكەري قىزمەتكەر قاشىقتىققا جۇگىرگەننەن كەيىن جاعدايى ناشارلاپ، اۋرۋحاناعا تۇسكەن. كەلەسى كۇنى ونىڭ بىرەۋى اۋرۋحانادا كوز جۇمعان. بۇل اقپاراتتى قر ۇلتتىق ۇلانى «وڭتۇستىك» وڭىرلىك قولباسشىلىعىنىڭ ءباسپاسوز قىزمەتى راستاپ وتىر. رەسمي حابارلامادا: «2023 جىلى 15 ماۋسىمدا شىمكەنت قالاسىنداعى 6506 اسكەري ءبولىمنىڭ جاۋىنگەرلىك دايارلىق جوسپارىنا سايكەس، اسكەري قىزمەتشىلەر ويلى-قىرلى جەرلەردە قاشىقتىققا جۇگىرۋ جاتتىعۋىن وتكىزگەن. شارا اياقتالعان سوڭ اسكەري قىزمەتشى ب. بايجانوۆ ءوزىن ناشار سەزىنگەن، وعان دەرەۋ العاشقى مەديتسينالىق كومەك كورسەتىلدى. ءارى قاراي ول شىمكەنت قالاسىنىڭ ءبىرىنشى قالالىق كلينيكالىق اۋرۋحاناسىنا جەتكىزىلىپ، جانساقتاۋ بولىمىنە جاتقىزىلدى. ەرتەسىنە ساعات 17.15 شاماسىندا اسكەري قىزمەتشى قايتىس بولدى»،-دەپ جازىلعان. دەرەك بويىنشا ءمان-جايدى انىقتاۋ ءۇشىن قىزمەتتىك تەرگەۋ جۇرگىزىلىپ جاتىر.