قازاقستان پارلامەنتى زاڭسىز الىنعان مۇلىكتى مەملەكەتكە قايتارۋ تۋرالى زاڭدى ماقۇلدادى، دەپ حابارلايدى “ادىرنا” ۇلتتىق پورتالى.
پارلامەنت سەناتى بەيسەنبى كۇنگى جالپى وتىرىستا «زاڭسىز الىنعان مۇلىكتى مەملەكەت مەنشىگىنە قايتارۋ تۋرالى» جانە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە زاڭسىز الىنعان مۇلىكتى مەملەكەتكە قايتارۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭداردى ماقۇلدادى.
ەندى زاڭدار پرەزيدەنتتىڭ قول قويۋىنا جىبەرىلەدى.
ەسكە سالايىق، 20 ماۋسىمدا ءماجىلىس پەن سەنات بىرلەسكەن وتىرىسىندا «پروكۋراتۋرا تۋرالى» كونستيتۋتسيالىق زاڭعا ەلدەن شىعارىلعان مۇلىكتى قايتارۋ تەتىگىن بەكىتەتىن وزگەرىستەردى ماقۇلداعان بولاتىن.
بۇل زاڭ جوباسى تۋرالى پرەزيدەنت توقاەۆ بىلتىر كۇزدە ايتقان. جالپى ماسەلەنىڭ توركىنى قاڭتار وقيعاسىنان كەيىن قوزعالا باستاعان. جوق دەگەندە 238 ادامنىڭ ءومىرىن قيعان قاڭتار وقيعاسىنان كەيىن قازاقستان پرەزيدەنتى قاسىم-جومارت توقاەۆ ەلدىڭ ەكس-پرەزيدەنتى نۇرسۇلتان نازارباەۆتىڭ تۇسىندا بايىعان "بەلگىلى ءبىر ادامدار" تۋرالى ايتا كەلىپ، "قازاقستاننىڭ بايلىعى 162 ادامنىڭ قولىندا" دەگەن. كەيىن پرەزيدەنت تاپسىرماسى بويىنشا ەلدەن زاڭسىز شىعارىلعان اكتيۆتەردى قايتارۋ كوميسسياسى جاساقتالعان بولاتىن.
ال زاڭنىڭ جوبا كەزەڭىندە ونى سىناعان دەپۋتاتتار دا بولعان.
بۇرىنعى پرەزيدەنت نۇرسۇلتان نازارباەۆتىڭ بيلىكتە بولعان كەزىندە 6 شىلدە قازاقستاندا ەرەكشە اتالىپ وتىلەتىن. "استانا كۇنى" اتالعانىمەن بۇل كۇن - نازارباەۆتىڭ تۋعان كۇنى. بۇرىنعى پرەزيدەنت بيىل 83-كە تولادى.
