مەملەكەت باسشىسى قاسىم-جومارت توقاەۆ اقپارات جانە قوعامدىق دامۋ ءمينيسترى دارحان قىدىرالىنى قابىلدادى. بۇل تۋرالى اقوردا مالىمدەدى، دەپ حابارلايدى “ادىرنا” ۇلتتىق پورتالى.
كەزدەسۋ بارىسىگدا پرەزيدەنتكە مينيسترلىكتىڭ اقپارات، قوعامدىق دامۋ، ءدىن جانە ەتنوسارالىق قاتىناستار، ازاماتتىق سەكتور، سونداي-اق جاستار جانە وتباسى ساياساتىن جۇزەگە اسىرۋ باعىتىندا اتقارىپ جاتقان جۇمىستارى جونىندە باياندالدى.
سونداي-اق، مينيستر ءوز جۇمىسىندا وتاندىق تەلەسەريالدار ءوندىرىسى كولەمىن ۇلعايتىپ، ولاردى شەتەلگە تاراتۋعا، مەديا ساۋاتتىلىقتى ارتتىرۋعا، سونداي-اق ازاماتتىق قوعاممەن ءوزارا قارىم-قاتىناستى جانداندىرۋعا ايرىقشا ءمان بەرىپ وتىرعانىن جەتكىزدى.
ال توقاەۆ مينيسترلىك ازاماتتىق قوعام ينستيتۋتتارىمەن بارلىق دەڭگەيدەگى بايلانىستى كۇشەيتىپ، ءار سالاداعى وزەكتى ماسەلەلەردى قوعاممەن كەڭ كولەمدە تالقىلاۋعا اشىق بولۋى قاجەت ەكەنىن اتاپ ءوتتى.
ودان بولەك، دارحان قىدىرالىگە جاستار ساياساتىنا قاتىستى باعدارلامالاردى ءتيىمدى جۇزەگە اسىرۋدى، ءدىني بىرلەستىكتەر مەن ەتنوسارالىق قارىم-قاتىناس باعىتىن ايرىقشا نازاردا ۇستاۋدى تاپسىردى.
