شىعىس قازاقستاندا كوپقاباتتى تۇرعىن ۇيگە وق اتىلعان

شىعىس قازاقستان وبلىسىندا كوپقاباتتى تۇرعىن ۇيلەردىڭ بىرىنە اتىس قارۋىمەن شابۋىل جاسالدى، دەپ حابارلايدى "ادىرنا" پورتالىنىڭ ءتىلشىسى. «التاي اۋدانىنىڭ پوليتسيا بولىمىنە قالا تۇرعىنى حابارلاسىپ، كەشكى ۋاقىتتا بەلگىسىز بىرەۋ ونىڭ پاتەرىنىڭ تەرەزەسىنە وق اتىپ، سونىڭ سالدارىنان 50 مىڭ تەڭگە كولەمىندە شىعىن كەلتىرگەنىن جەتكىزدى، پوليتسيا قىزمەتكەرلەرى كورسەتىلگەن مەكەن جايعا دەرەۋ جەتكەنىن ايتتى. جەدەل-ىزدەستىرۋ ءىس-شارالارىن جۇرگىزۋ بارىسىندا ءتارتىپ ساقشىلارى كۇدىكتىنى انىقتاپ، ۇستادى. ول كورشى تۇراتىن 23 جاستاعى جاس جىگىت بولىپ شىقتى»، - دەپ حابارلادى دۇيسەنبىدە شقو ءىىد (پد) ءباسپاسوز قىزمەتى. ۇستالعاننىڭ ۇيىنەن جەدەل ءتىنتۋ بارىسىندا پوليتسەيلەر 12-كاليبرلى ەكى پاترون، يج-18 ەم-م ماركالى ءبىر اۋىزدى اڭشى مىلتىعى جانە 12-گاباريتتى ءۇش گيلزا، سونىمەن قاتار 12-كاليبرلى سەگىز گيلزانى تاۋىپ، تاركىلەدى. «انىقتالعانداي، سول كۇنى كەشكە ەر ادام جابىرلەنۋشىنىڭ ۇستىندە تۇراتىن كورشىسىمەن توبەلەسكەن. كۇدىكتى سىرتقا شىعىپ، مىلتىعىن نىساناعا باعىتتاعان، بىراق – وق جازىقسىز كورشىسىنىڭ تەرەزەسىنە ءتيدى. كەيىن بەلگىلى بولعانداي، قۇقىق بۇزۋشىنىڭ تەرەزەلەرى اۋلانىڭ ەكىنشى جاعىنا قارايتىنى انىقتالعان»، - دەلىنگەن حابارلامادا. قر قىلمىستىق كودەكسىنىڭ 293-بابىنىڭ 3-بولىگى (بۇزاقىلىق) بويىنشا قىلمىستىق ءىس قوزعالدى.