تۇركيا پرەزيدەنتى رەجەپ تايىپ ەردوعان پۋتينمەن بولعان كەزدەسۋدەن كەيىنگى ءباسپاسوز ءماسليحاتىنا قاتىسىپ، ء"مانسىز مامىلە" جايىن ايتتى. پرەزيدەنتتىڭ ايتۋىنشا، استىق ساۋداسىنا قاتىستى كەلىسسوز ءساتسىز اياقتالعان. ناقتىراق ايتقاندا، رەسەي فەدەراتسياسىنىڭ پرەزيدەنتى ءوز تالاپتارىن العا تارتىپ، كەلىسىمدى جاڭارتۋدان باس تارتقان، دەپ حابارلايدى "ادىرنا" ۇلتتىق پورتالى.
تۇركيا باسشىسى رەجەپ تايىپ ەردوعانمەن مەن رەسەي پرەزيدەنتى ۆلاديمير پۋتين 4 قىركۇيەك، دۇيسەنبى، كۇنى سوچيدە باس قوستى. اتالمىش كەزدەسۋدە ۋكراين استىعىن قارا تەڭىزگە ەكسپورتتاۋعا مۇمكىندىك بەرەتىن "استىق مامىلەسى" ءساتسىز اياقتالىپ، بۇل باعىتتاعى ساۋدا-cاتتىقتى قايتا جاڭعىرتۋ جايى وڭىنان شەشىلمەدى.
رەسەي پرەزيدەنتى مۇنداي كەلىسىمنىڭ تەك "رەسەي اگروونىمىنىڭ ەكسپورتىنا شەكتەۋلەر الىنىپ تاستالعان" جاعدايدا عانا ماقۇلدانۋى مۇمكىن ەكەنىن ءباسپاسوز ءماسليحاتىندا ايتتى. مۇنىمەن قوسا، رەسەي تاراپىنىڭ 1 ميلليون توننا استىقتى "تۇركيادا وڭدەپ، سودان كەيىن كەدەي ەلدەرگە ارزانداتىلعان باعامەن تاراتۋدى" ۇيىمداستىراتىنىنا ۋادە بەردى.
ورايى كەلگەندە ايتا كەتەيىك، قارا تەڭىز ارقىلى استىق جەتكىزۋ رەسەي، ۋكراينا، تۇركيا جانە بۇۇ تاراپتارىنىڭ 2022 جىلدىڭ شىلدەسىندە قول قويعان كەلىسىمى نەگىزىندە جۇزەگە اسۋى كەرەك بولاتىن. مامىلە قارا تەڭىز ارقىلى استىقتى قاۋىپسىز ەكسپورتتاۋ ماسەلەسىن زاڭداستىرادى.
2023 جىلدىڭ 18 ناۋرىزىندا مامىلەنىڭ العاشقى مەرزىمى اياقتالدى. زاڭ بويىنشا، مۇددەلى تاراپتار قارسىلىق تانىتپاسا، مامىلە وزدىگىنەن تاعى 120 كۇنگە ۇزارتىلۋى كەرەك ەدى. دەگەنمەن رەسەي مامىلەنى تەك 60 كۇنگە ۇزارتاتىنىن حابارلادى. 17 شىلدەدە رەسەي فەدەراتسياسى پرەزيدەنتىنىڭ ءباسپاسوز حاتشىسى دميتري پەسكوۆ "رەسەي فەدەراتسياسىنىڭ استىق مامىلەسىنەن شىعاتىنىن" جاريالادى. ول قارا تەڭىز كەلىسىمدەرىندەگى "رەسەي مۇددەسىنە قاتىستى تۇستار ءالى ورىندالماعانىن" اتاپ ايتتى.
"ادىرنا" ۇلتتىق پورتالى
