تۋريزم – الماتى وبلىسى ەكونوميكاسىنىڭ قارقىندى دامىپ كەلە جاتقان سالاسى. اكىمدىك بۇل سالانى دامىتۋ بويىنشا تاياۋ جىلدارعا ارنالعان بولاشاعى زور جوسپار ازىرلەدى. قازىرگى كەزدە وبلىسقا جىلىنا 1,2 ميلليون تۋريست كەلەدى.
الماتى وبلىسى تۋريستەردى نەسىمەن باۋرايدى؟
ءوڭىر باسشىسى مارات سۇلتانعازيەۆ حالىققا ەسەپ بەرۋ كەزدەسۋىندە قازاقستانعا كەلەتىن ءاربىر ەكىنشى شەتەلدىك تۋريست الماتى اگلومەراتسياسىن تاماشالايتىنىن اتاپ ءوتتى.
شەتەلدىك تۋريستەردىڭ كوپ بولىگى رەسەي، قىتاي، وزبەكستان، قىرعىزستان، ءۇندىستان، تۇركيا، وڭتۇستىك كورەيا، گەرمانيا، اقش جانە ت.ب. ەلدەردەن كەلەدى.
وڭىرلىك بيلىك تۋريستەر ساياحاتتايتىن نەگىزگى باعدارلار بويىنداعى جايلى ينفراقۇرىلىمدى دامىتىپ، ونىڭ ىشىندە ۇلتتىق پاركتەر اۋماعىنداعى سوقپاقتاردى اباتتاندىرا وتىرىپ، زاماناۋي تۋريستىك ناۆيگاتسيا جۇيەسىن ازىرلەپ، قولدانىسقا ەنگىزۋگە نيەتتى. مۇنداي جۇمىستار بۇرىن شارىن شاتقالىندا، كولساي جانە قايىڭدى كولدەرىندە جۇرگىزىلگەن بولاتىن.
ەندى جەرگىلىكتى اكىمشىلىك باستى نازاردى وبلىس ورتالىعى قوناەۆ قالاسى مەن قاپشاعاي سۋقويماسىنا اۋدارىپ وتىر.
ءوڭىر باسشىسى مارات سۇلتانعازيەۆ اقپاراتتىق پۋنكتتەر جەلىسى، كەڭەسشىلەرى، تۋريستىك ناۆيگاتسياسى، كادەسىيلار دۇكەندەرى بار زاماناۋي ساپار-ورتالىق قۇرۋ قاجەتتىگىن اتاپ ءوتتى.
دەمالۋشىلاردىڭ قانداي شاعىمدارى بار؟
جەرگىلىكتى شيپاجايلاردىڭ قازىرگى جاعدايىن جاقسارتۋ قاجەت ەكەندىگى جاسىرىن ەمەس.
بىرقاتار ەسكەرتۋلەردەن كەيىن الماتى وبلىسىندا كولساي جانە قايىڭدى كولدەرىندە جازعى ۋاقىتتا قاۋىپسىزدىكتى قامتاماسىز ەتۋ، تۋريستەرگە اقپارات بەرىپ وتىرۋ ماقساتىندا تۋريستىك پوليتسيا جۇمىسىن ۇيىمداستىرۋ جوسپارلانىپ وتىر.
الماتى وبلىسىنىڭ اكىمى مارات سۇلتانعازيەۆ قازىرگى كەزدە ينۆەستورلاردىڭ بەلسەندى تۇردە تارتىلىپ جاتقانىن ايتتى. سونداي-اق كەيىنگى كەزدەرى وبلىستا 200-گە تارتا تۋريزم وبەكتىسىنىڭ پايدالانۋعا بەرىلگەنىن اتاپ وتكەنىمىز ءجون. 100-دەن استام تۋريستىك كومپانيا ليتسەنزيالىق نەگىزدە جۇمىس ىستەيدى. ءتۋريزمدى دامىتۋ جەرگىلىكتى حالىقتى تۇراقتى جۇمىس ورنىمەن قامتاماسىز ەتۋگە مۇمكىندىك بەرىپ وتىر.
