رەسەي مەكتەپتەرى العاشقى اسكەري دايىندىق ساباعى ءۇشىن كالاشنيكوۆ اۆتوماتىن، قول گراناتالارىن جانە باسقا دا اسكەري تەحنيكالاردى جاپپاي ساتىپ الىپ جاتىر، دەپ حابارلايدى «ادىرنا» ءتىلشىسى «Moskow Times» باسىلىمىنا سىلتەمە جاساپ.
2023 جىلدىڭ قاڭتارىنان باستاپ ءبىلىم بەرۋ مەكەمەلەرى «ءومىر قاۋىپسىزدىگىنە ارنالعان كابينەتتەرگە» قۇرال-جابدىق الۋ ءۇشىن 240 ميلليون رۋبلدەن استام قاراجات جۇمساعان.
ايتا كەتۋ كەرەك، العاشقى اسكەري دايىندىق پانىنە قاجەت زاتتاردى ساتىپ الۋ شىعىنى باسقا مەكتەپ پاندەرىنە كەرەك قۇرال-جابدىقتاردى ساتىپ الۋعا كەتكەن قارجىدان ايتارلىقتاي اسىپ ءتۇستى. ماسەلەن، ورىس مەكتەپتەرى حيميا پانىنە شامامەن 64 ميلليون رۋبل، فيزيكاعا 11 ميلليون رۋبل، بيولوگياعا 21 ميلليون رۋبل جۇمساعان.
«ماسكەۋ مەن ماسكەۋ وبلىسىنىڭ ءبىلىم ءبولىمى اسكەري تەحنيكانى ساتىپ الۋعا 14 ميلليون رۋبل (67,5 ميلليون تەڭگە) بولگەن. ال كەمەروۆ وبلىسىندا ءومىر قاۋىپسىزدىگى نەگىزدەرى ءپانىنىڭ مۇعالىمدەرى سوعىسقا قاتىسۋشىلارمەن الماستىرىلا باستادى. ءبىلىم ءبولىمى ءااد قۇرال-جابدىقتارىن الۋعا 50 ميلليون رۋبلدەن اسا قارجى جۇمساعان»،—دەپ جازدى باسىلىم.
كەلىسىمشارتتاردىڭ مازمۇنى جاسىرىلماعان ساتىپ الۋلاردا ءبىلىم بەرۋ ۇيىمدارىنىڭ شامامەن 1280 كالاشنيكوۆ اۆتوماتىن ساتىپ العانىن كورۋگە بولادى. بۇدان بولەك مەكتەپتەرگە 5,45 كاليبرلى پاتروندار، قوسالقى جۋرنالدار، ف-1 جانە رگد-5 گراناتالارىنىڭ ماكەتتەرى، اتۋ ترەناجەرلارى جەتكىزىلگەن.
