اسەمگۇل سۇلەيمەنوۆا بريتاندىق «Golden Time Talent» حالىقارالىق بايقاۋىنىڭ «كەسكىندەمە» نوميناتسياسى بويىنشا جەڭىمپاز اتاندى، دەپ حابارلايدى «ادىرنا» ءتىلشىسى. تالانتتى جاننىڭ جەڭىستى كۇنگە دەيىنگى ونەر جولى جايلى «ادىرنا» ماتەريالىندا.
حالىقارالىق بايقاۋدىڭ «كەسكىندەمە» ايدارى بويىنشا 30-دان استام ەل مەن 190 قاتىسۋشى قاتىستى، سولاردىڭ اراسىنان وتانداسىمىزدىڭ «انا مەن بالا» تۋىندىسى جەڭىسكە جەتتى.
اسەمگۇل سۇلەيمەنوۆا – ورال قالاسىنىڭ تۋماسى. كىشكەنتايىنان سۋرەت ونەرىنە بەيىم ەكەنىن بايقاعان اناسى، ءتۇرلى ۇيىرمەلەرگە قاتىستىرعان. كەيىننەن استانا قالاسىنداعى «ونەر» ۋنيۆەرسيتەتىنىڭ «مونۋمەنتالدى كەسكىندەمە» ماماندىعىن تامامداعان.
31 جاستاعى ونەر يەسى تۇرمىس قۇرعان، وتباسىلى جان. ەڭ قىزىعى جەڭىسكە جەتكەن كارتيناداعى ايەل بەينەسى اسەمگۇلدىڭ ەنەسىنىڭ پورترەتى:
قازىرگى تاڭدا اسەمگۇلدىڭ 20 شاقتى اۆتورلىق كارتينالارى بار. ونىڭ كوپشىلىگى حالىق سۇرانىسىندا ساتىلىمدا. تاپسىرىسپەن دە سۋرەتتەر سالىپ، ءتۇرلى بايقاۋلاردا باق سىناپ جۇرگەنىن ايتتى ول.
«Golden Time Talent» حالىقارالىق ونەرپازدار بايقاۋى. اسەمگۇل بۇل سايىستان جەڭىسكە جەتەمىن، ورىن الامىن دەگەن ويى بولماعانىن ايتتى. باستىسى تاجىريبە جيناۋ، باق سىناۋ، قاتىسىپ كورۋ نيەتى بولعانىن جەتكىزدى:
سۋرەتشى كوممەرتسيالىق جوبالار ءۇشىن ءارتۇرلى تەحنيكا مەن ستيلدەردى بايقاپ كورەدى. دەگەنمەن، جەڭىمپازدىڭ جۇمىستارىنىڭ باسىم كوپشىلىگىنەن ۇلتتىق ناقىشتاعى ەلەمەنتتەردى ءجيى كورۋگە بولادى.
قازىر اسەمگۇلدىڭ ونەرىنە سۇيسىنگەن جۇرت الەۋمەتتىك جەلىلەردە ءتۇرلى جاعىمدى پىكىرلەر قالدىرىپ، ونەرپازدىڭ ونەرىنە قولداۋ بىلدىرۋدە.
«كارتينا اتاۋى «انا مەن بالا» دەپ اتالادى. بۇل «جامبىلدىڭ جاستىق شاعى» فيلمىندەگى كەسكىندەمە. مەنىڭ ەنەم سول فيلمدە جامبىلدىڭ جەڭگەسى بولىپ وينايدى. سۋرەتتەگى ءۇش جاسار بالا مەنىڭ قازىرگى كۇيەۋىم. 1995 جىلعى كينوتۋىندىنىڭ وسى ءبىر ءساتى مەن ءۇشىن جىلى بەينە بولىپ كورىندى. ءدال وسى كادردان انانىڭ بالاعا دەگەن ەرەكشە ماحابباتى مەن جىلۋلىق بايقادىم» دەپ ءبولىستى اسەمگۇل كارتينا تۋرالى.

«سۇيىكتى سۋرەتشىلەرىم كوپ. ونىڭ ىشىندە ءوزىمىزدىڭ مۋلاشەۆ كاميل ۋالياحمەدۇلىن اتاماسام بولماس. ول كىسى ماعان ءبىرىنشى كۋرستا ساباق بەرىپ، سۋرەت ونەرىندەگى ۇستازىم بولدى. كوپ نارسەنى سول كىسىدەن ۇيرەندىم جانە ءالى كۇنگە دەيىن سۋرەت سالۋداعى ەرەكشەلىكتەرىم سول كىسىنىڭ ستيليستيكاسىنا ۇقساس بولىپ كەلەدى» دەدى ول.


«بايقاۋ ناتيجەسى تۋرالى تۋرالى كەشە ءبىلدىم، باسىندا ءتىپتى سەنبەدىم، بىراق تۇسىنگەن كەزدە حالىقپەن ءبولىسۋدى ءجون كوردىم. قۋانىشتان جىلاپ جىبەردىم. قانشا جىلعى ەڭبەگىم اقتالدى دەپ بىلەمىن. شىعارماشىلىق الەمدە ءوزىڭدى دالەلدەۋ قاشان دا قيىن. بۇرىن ءبىزدىڭ سپورشىلار جانە وزگە دە ونەرپازدارىمىز ەلىمىزدى الەمگە تانىتىپ، جەتىستىكتەرگە جەتىپ جاتقانىندا قاتتى قىزىعاتىنمىن. مەن دە سۋرەت ونەرىندە ەلىمىزدى الەمگە پاش ەتىپ، كوك تۋىمىزدى كوكتە جەلبىرەتەمىن دەگەن ماقسات بولاتىن. مىنە سول بالا ارمانىم ورىندالدى. مەن باقىتتىمىن»، - دەيدى اسەمگۇل.

دينا ليتپين،
«ادىرنا» ۇلتتىق پورتالى