جامبىل وبلىسىندا سنارياد جارىلىپ، 3 جاۋىنگەر جاراقات الدى دەپ حابارلايدى «ادىرنا» ۇلتتىق پورتالى.
KTK ارناسىنىڭ مالىمەتىنشە، وقيعا جامبىل وبلىسىنداعى «ايشا ءبيبى» اسكەري پوليگونىندا بولعان. اۋرۋحاناعا جەدەل جەتكىزىلگەن ۇلتتىق ۇلاننىڭ ءبىر جاۋىنگەرى شىمكەنتكە جىبەرىلىپ، ءبىرى تارازداعى جانساقتاۋ بولىمىنەن ءبىر-اق شىققان. ال 26 جاستاعى وفيتسەردىڭ اياعى سىنعان.
دارىگەرلەر «وتا جاسالعان قوس جاۋىنگەردىڭ بەتى بەرى قارادى» - دەيدى.
اقپاراتقا سايكەس، تاراز ماڭىنداعى پوليگونعا جاۋىنگەرلەر ۇلتتىق ۇلاننىڭ شىمكەنتتەگى اسكەري بولىمىنەن كەلگەن. وقۋ-جاتتىعۋ جيىنى كەزىندە كەنەت ارتيللەريالىق قارۋلاردىڭ ءبىرى دۇرىس اتىلماي، 82 ميليمەترلىك سنارياد وفيتسەرلەردىڭ قاسىنا قۇلاعان. قازىر اسكەري پوليتسيا وسى وقيعاعا قاتىستى تەرگەۋ جۇمىستارىن باستادى. ال جازاتايىم جاعدايدى كومانديرلەر كوزبەن كورسە دە، وقيعانىڭ قالاي بولعانىن اشىپ ايتپاي وتىر.
مارات راحپانوۆ، قر ۇلتتىق ۇلانى «وڭتۇستىك» وڭىرلىك قولباسشىلىعىنىڭ 6506 اسكەري ءبولىمىنىڭ كومانديرى:
- وقۋ-جاتتىعۋ كەزىندە ارتيللەريالىق قارۋدى جوسپارلى اتۋ كەزىندە سنارياد جارىلدى. تەرگەۋدى تاراز گارنيزونىنىڭ اسكەري پوليتسياسى جۇرگىزىپ جاتىر. ال مينومەتتەردىڭ بارلىعى قولدانۋعا جارامدى. قاناعاتتاندىرارلىق كۇيدە. وفيتسەرلەر جاراقاتىنان ايىققان بويدا قاتارعا قايتا قوسىلادى.
ەسكە سالساق، قاراعاندى وبلىسىنىڭ بالاپان الاڭىندا وقۋ-جاتتىعۋ ءوتىپ، P2002 ءتيپتى UPLA286 ۇشاعى اۋەگە كوتەرىلگەننەن كەيىن بايلانىسقا شىقپاي، سالدارىنان ەكى ەكيپاج مۇشەسى قازا تاپقانىن جازعان ەدىك.
«ادىرنا» ۇلتتىق پورتالى
