مەملەكەت باسشىسى قارجىلىق مونيتورينگ اگەنتتىگىنىڭ توراعاسى جانات ەليمانوۆتى قابىلدادى. قارجىلىق مونيتورينگ اگەنتتىگىنىڭ بيىلعى 9 ايدا اتقارعان جۇمىستارىنىڭ ناتيجەسى جانە الداعى ۋاقىتقا ارنالعان جوسپارى باياندالدى، دەپ حابارلايدى«ادىرنا» ۇلتتىق پورتالى اقوردانىڭ ءباسپاسوز قىزمەتىنە سىلتەمە جاساپ.
ءباسپاسوز مالىمەتىنە سايكەس، قاسىم-جومارت توقاەۆقا جىل باسىنان بەرى مەملەكەتكە جالپى سوماسى 217 ميلليارد تەڭگە بولاتىن اكتيۆتەر قايتارىلعانى، سونداي-اق كولەڭكەلى ەكونوميكانىڭ دەڭگەيى 18,7 پايىزعا دەيىن تومەندەگەنى جونىندە مالىمەت بەرىلدى.
سونىمەن قاتار جانات ەليمانوۆ قۇقىق قورعاۋ ورگاندارىنا 229 تالداۋ ماتەريالى جولدانعانىن، ەسىرتكى ساتۋشىلاردىڭ قارجىلىق وپەراتسيالارىن بۇعاتتاۋ تاجىريبەسى جولعا قويىلعانىن ايتتى. بۇل جۇمىس ازاماتتاردى، اسىرەسە جاستاردى، ەسىرتكىنى ونلاين ساتىپ الۋدان ساقتايدى.
ونىڭ ايتۋىنشا، ەسىرتكىنىڭ زاڭسىز اينالىمىنان تۇسەتىن كىرىستەردى جىلىستاتۋ ءۇشىن پايدالانىلعان 924 بانكتىك شوت بۇعاتتالعان. كريپتواكتيۆتەردى پايدالانا وتىرىپ جاسالاتىن ەكونوميكالىق قىلمىستارعا قارسى ءىس-قيمىل جونىندەگى ارنايى بولىمشە قۇرىلعان. كريپتو-امياندارعا تىيىم سالۋ جانە تسيفرلىق ۆاليۋتانى الىپ قويۋ تەتىگى ازىرلەنگەن. زاڭسىز 9 كريپتو الماستىرعىشتىڭ قىزمەتى جويىلعان. ونداعى قارجى اينالىمى 17 ميلليارد تەڭگەدەن اسقان.
پرەزيدەنتكە قازاقستاندا العاش رەت كريپتوۆاليۋتا ارقىلى قىلمىستىق جولمەن تاپقان 47 ميلليون تەڭگە تابىس تاركىلەنىپ، اگەنتتىكتىڭ Binance كريپتوبيرجاسىنداعى ارنايى شوتىنا سالىنعانى جونىندە باياندالدى. بۇدان بولەك، تەرروريستىك جانە ەكسترەميستىك ۇيىمداردىڭ شوتتارىنا قاراجات اۋدارۋدى كوزدەگەن 976 ارەكەت انىقتالىپ، بۇعاتتالعان. ەكونوميكالىق قۇقىق بۇزۋشىلىقتاردىڭ كەيبىر بەلگىلەرى بويىنشا قىلمىستىق قۋدالاۋدى جەڭىلدەتۋ (دەكريميناليزاتسيا) تۋرالى ۇسىنىستار ەنگىزىلگەن. بۇل كاسىپكەرلەردى قورعاۋ شارالارىن كۇشەيتۋگە مۇمكىندىك بەرەدى.
قاسىم-جومارت توقاەۆ قارجىلىق مونيتورينگ اگەنتتىگىنىڭ توراعاسىنا اگەنتتىك قىزمەتىنىڭ نەگىزگى باعىتتارى بويىنشا بىرقاتار ناقتى تاپسىرما بەردى. مەملەكەت باسشىسى ادال بيزنەستى قورعاۋ، قارجى جانە ەكونوميكالىق قىلمىستارعا قارسى كۇرەس شارالارىن كۇشەيتۋ قاجەت ەكەنىن ەرەكشە اتاپ ءوتتى.
«ادىرنا» ۇلتتىق پورتالى
