تۇركىستاندا يمام مەشىت اجەتحاناسىنا كىرمەك بولعان تازالىققا جاۋاپتى كوممۋنالدى سالا جۇمىسشىلارىن قۋىپ شىقتى، دەپ حابارلايدى «ادىرنا» ۇلتتىق پورتالى.
Otyrar.kz مالىمەتىنشە، وقيعا تۇركىستان قالاسىندا بولعان. سول ءساتتىڭ ۆيدەوسى الەۋمەتتىك جەلىدە پايدا بولدى.
«تۇركىستان تازالىق» جۇمىسشىلارى مەشىتكە كەلىپ، دارەتحاناعا سۇرانعان. ءيا، تاڭنىڭ اتىسىنان، كۇن باتقانشا كوشەدەگى ءبىزدىڭ تاستاعان قوقىسىمىزدى جيناپ، تازالاپ جۇرەتىن كىسىلەر. مەشىتكە كىرە الماسا، سوندا بۇل كىسىلەردىڭ ەڭبەگى ادال، وزدەرى حارام بولعانى ما؟»، - دەپ جازدى ۆيدەو اۆتورى.
بەينەجازبادان مەشىت ەسىگىنىڭ الدىندا ءدىن وكىلى مەن قالا تازالىعىنا جاۋاپتى مەكەمەنىڭ جۇمىسشى ايەلىن كورۋگە بولادى. ال مەشىتتىڭ قاقپا تۇسىندا ەكىنشى كوشە سىپىرۋشى تۇر.
«كەت دەيمىن، تىنىشتىقپەن كەت! بۇل جەر كوپشىلىكتىڭ «تۋالەتى» ەمەس! «داۆاي، مەن پوكا نەعىماي» تۇرعان كەزدە كەت!»،- دەيدى قاتتى داۋىسپەن ءدىن وكىلى.
وسى ساتتە كوشە سىپىرۋشى ايەل مەشىت اجەتحاناسىنا كىرۋ – شاريعاتقا كەرى ەمەس شىعار دەپ سۇرايدى. الايدا، بۇل ساۋال مولداعا جاقپاي قالعان سەكىلدى.
«ە، كەت دەيمىن»،- دەگەن يمام.
مەشىت ىشىنەن شىققان وزگە ەر ادامدار باسىنا سالدە كيگەن مولدانىڭ بۇل ارەكەتى بۇرىس ەكەنىن العا تارتىپ، ءتىپتى وعان «ايقايلاي بەرمە» دەپ ەسكەرتۋ جاساعان. ۆيدەو سوڭىندا اجەتىن وتەۋگە كەلگەن كوشە تازالىقشىلارى مەشىت اجەتحاناسىنا ءبارىبىر دە كىرە الماي كەتكەنىن كورۋگە بولادى.
مەشىت الدىندا ادەپسىزدىك قىلىق تانىتقان يمامنىڭ ارەكەتى كوپتەگەن قازاقستاندىقتىڭ اشۋىن تۋدىردى.
«مىنا مولدا جىندانعان با؟ اجەتحانا ءۇشىن نەگە سونشاما جىرتىلىپ تۇر؟»، «مىناۋ يمام با، كىم ءوزى؟ مەشىتتەن ءوزىن قۋ كەرەك. پسيحديسپانسەرگە جاتقىزىپ ەمدەۋ كەرەك قوي»، «مىنانى مەشىتتەن الاستاتۋ قاجەت! بۇنداي ادامعا اللانىڭ ۇيىندە ورىن جوق»، «يمامىمىز مىنانداي بولسا، باسقالارعا نە ايتۋعا بولادى؟»، «مىنا يمامنىڭ ارەكەتى دۇرىس بولماپتى. اجەتحانانى قىزعانعانى نەسى؟..»، «سونشا ايقايلايدى عوي، يمام دەگەن سابىرلى بولماي ما؟»، «قۇتىرىپ بولعان ەكەن، حالىقتىڭ ساداقاسىمەن كۇن كورىپ وتىرعانىن ۇمىتىپ تۇر ما؟..»، «اقشا سالاتىن جاشىككە ساداقا سالايىن» دەپ ەدىم دەسە، قالاي كىرگىزەر ەدى…»، - دەپ جازعان جەلىدەگىلەر.
«ادىرنا» ۇلتتىق پورتالى
