Túrkistanda ımam meshit ájethanasyna kirmek bolǵan tazalyqqa jaýapty kommýnaldy sala jumysshylaryn qýyp shyqty, dep habarlaıdy «Adyrna» ulttyq portaly.
Otyrar.kz málimetinshe, oqıǵa Túrkistan qalasynda bolǵan. Sol sáttiń vıdeosy áleýmettik jelide paıda boldy.
«Túrkistan Tazalyq» jumysshylary meshitke kelip, dárethanaǵa suranǵan. Iá, tańnyń atysynan, kún batqansha kóshedegi bizdiń tastaǵan qoqysymyzdy jınap, tazalap júretin kisiler. Meshitke kire almasa, sonda bul kisilerdiń eńbegi adal, ózderi haram bolǵany ma?», - dep jazdy vıdeo avtory.
Beınejazbadan meshit esiginiń aldynda din ókili men qala tazalyǵyna jaýapty mekemeniń jumysshy áıelin kórýge bolady. Al meshittiń qaqpa tusynda ekinshi kóshe sypyrýshy tur.
«Ket deımin, tynyshtyqpen ket! Bul jer kópshiliktiń «týaleti» emes! «Davaı, men poka neǵymaı» turǵan kezde ket!»,- deıdi qatty daýyspen din ókili.
Osy sátte kóshe sypyrýshy áıel meshit ájethanasyna kirý – sharıǵatqa keri emes shyǵar dep suraıdy. Alaıda, bul saýal moldaǵa jaqpaı qalǵan sekildi.
«E, ket deımin»,- degen ımam.
Meshit ishinen shyqqan ózge er adamdar basyna sálde kıgen moldanyń bul áreketi burys ekenin alǵa tartyp, tipti oǵan «Aıqaılaı berme» dep eskertý jasaǵan. Vıdeo sońynda ájetin óteýge kelgen kóshe tazalyqshylary meshit ájethanasyna báribir de kire almaı ketkenin kórýge bolady.
Meshit aldynda ádepsizdik qylyq tanytqan ımamnyń áreketi kóptegen qazaqstandyqtyń ashýyn týdyrdy.
«Myna molda jyndanǵan ba? Ájethana úshin nege sonshama jyrtylyp tur?», «Mynaý ımam ba, kim ózi? Meshitten ózin qýý kerek. Psıhdıspanserge jatqyzyp emdeý kerek qoı», «Mynany meshitten alastatý qajet! Bundaı adamǵa Allanyń úıinde oryn joq», «Imamymyz mynandaı bolsa, basqalarǵa ne aıtýǵa bolady?», «Myna ımamnyń áreketi durys bolmapty. Ájethanany qyzǵanǵany nesi?..», «Sonsha aıqaılaıdy ǵoı, ımam degen sabyrly bolmaı ma?», «Qutyryp bolǵan eken, halyqtyń sadaqasymen kún kórip otyrǵanyn umytyp tur ma?..», «Aqsha salatyn jáshikke sadaqa salaıyn» dep edim dese, qalaı kirgizer edi…», - dep jazǵan jelidegiler.
«Adyrna» ulttyq portaly
