1990 جىلى 25-قازاندا ءحىى سايلانعان جوعارعى كەڭەستىڭ سەسسياسىندا «قازاق سسر-ءىنىڭ مەملەكەتتىك ەگەمەندىگى تۋرالى دەكلاراتسيا» قابىلدانۋى قۇرمەتىنە تاعايىندالعان رەسپۋبليكا كۇنى بىزگە اسا قىمبات مەيرام بولاتىن. وكىنىشكە قاراي بۇل مەيرامنىڭ رۋحاني قۋاتتىلىعى ەكس-پرەزيدەنتكە ۇناماي ءتۇرلى جەلەۋمەن 17 جىلدان كەيىن 2008 جىلى تاۋەلسىزدىك كۇنىنە ءسىڭىرىلىپ جىبەرىلدى. ءسويتىپ مۇلدە اتاۋسىز قالدى. الايدا قوعامدىق جۇرتشىلىقتىڭ، جازۋشىلار مەن جۋرناليستەر قاۋىمىنىڭ ۇزدىكسىز ۇسىنىستارى مەن تالاپتارىنىڭ ارقاسىندا اراعا 14 جىل سالىپ رەسپۋبليكا كۇنى مەرەكەلىك كۇنتىزبەگە قايتىپ ورالدى. اللاعا شەكسىز شۇكىرشىلىك، وتكەن، 2022 جىلى مەملەكەت باسشىسى ق.توقاەۆ شىعارعان ارنايى جارلىقپەن بۇل داتا ۇلتتىق مەرەكە رەتىندە اتالىپ وتىلەتىن بولدى.
بىراق وسى مەرەكەنىڭ رەسپۋبليكا كۇنى اتاۋى ماعىناسىز. كوپشىلىككە ونشا ۇنامايدى. بۇل قاي رەسپۋبليكا كۇنى؟ 1920 جىلى 26 تامىزداعى رسفسر قۇرامىنداعى اۆتونوميالىق رەسپۋبليكا ما؟ الدە 1936 جىلعى 5-جەلتوقساندا قۇرىلعان وداقتاس رەسپۋبليكا ما؟ تۇسىنىكسىزدەۋ.
اقيقاتى – ارىدە! ەگەمەندىك دەكلاراتسياسى قابىلدانعان تۇستا قازاقستان ءالى كەڭەس وداعىنىڭ قۇرامىندا بولاتىن. كومپارتيا ەلدەگى بيلىكتەن قولىن ءالى اجىراتا قويماعان. سودان باسشىلىق ساياسي ماعىناسى تەرەڭ ازاتتىق كۇنى دەپ اتاۋدان جاسقانىپ، ەشتەمە مىندەتتەمەيتىن جىعا سالدى رەسپۋبليكا كۇنى اتاۋىنا توقتاعان. ەگەمەندىك ەيفورياسىمەن مۇنى بايقامادىق. حالىق سولاي بولۋ كەرەك شىعار دەپ قابىلدادى.
الايدا مەرەكەنىڭ اقيقات ءمانى – بۇل داتا قازاق حالقىن اڭساعان ازاتتىعىنا جاقىنداتا ءتۇستى. قازىر ۇستىمىزدەن وداق ءتونىپ تۇرعان جوق. كومپارتيا بيلىكتەن كەتكەلى قاشان؟ قازاقستان مەملەكەتتىك ەگەمەندىك دەكلاراتسياسىنا، وعان نەگىزدەپ جاريالاعان تاۋەلسىزدىگىنە، قولدانىستاعى كونستيتۋتسياسىنا سايكەس ەشكىمگە جالتاقتاماي ءوز ماسەلەسىن ءوزى شەشەدى.
سوندىقتان بۇل ساياسي مەيرامنىڭ اقيقات اتاۋى – ازاتتىق مەرەكەسى بولۋعا ءتيىس!
