“ارسەلورميتتال” كومپانياسىنىڭ اكتسيالارى قاراعاندى وبلىسى كوستەنكو كەنىشىندەگى اپاتتان جانە اكتيۆتەردى قازاقستانداعى «ارسەلورميتتال تەمىرتاۋ» اق-نا بەرۋ تۋرالى اقپاراتتان كەيىن قۇلدىرادى، دەپ حابارلايدى “ادىرنا” ۇلتتىق پورتاليا قازتاگ-قا سىلتەپ.
دۇيسەنبىدە قازاقستان ۇكىمەتى «ارسەلورميتتال تەمىرتاۋ» اق (AMT) اكتسيالارىن مەملەكەت مەنشىگىنە وتكىزگەنىن جاريالاعاننان كەيىن امستەردام قور بيرجاسىندا ArcelorMittal اكتسيالارى 5,5%-عا ارزاندادى.
وتكەن جۇما، 27 قازاندا باعا ءبىر باعالى قاعاز ءۇشىن 21,07 ەۋرونى قۇرادى. دۇيسەنبى، 30 قازان، استانا ۋاقىتى بويىنشا 14:52 – باعا 19,9 ەۋرونى قۇرادى.
ايتا كەتەيىك، لاكشمي ميتتال - الەمدەگى ەڭ ءىرى بولات كومپانيالارىنىڭ ءبىرى ArcelorMittal كومپانياسىنىڭ باسشىسى جانە “ArcelorMittal تەمىرتاۋ” -دىڭ نەگىزگى ينۆەستورى.
ەستەرىڭىزگە سالا كەتەيىك، 28 قازاندا كوستەنكو شاحتاسىنىڭ ۇزىن قابىرعاسىندا مەتان گازى جارىلدى. سوققى تولقىنىنىڭ تارالۋ دياپازونى 2 كم-دەن استام بولدى. قازا بولعان 46 كەنشىنىڭ بارلىعىنىڭ دەنەسى تابىلدى.
پرەزيدەنت قاسىم-جومارت توقاەۆ قازاقستان ۇكىمەتىنە «ارسەلورميتتال تەمىرتاۋ» اق-مەن ىنتىماقتاستىقتى توقتاتۋدى تاپسىردى. قاراعاندى وبلىسىندا كەنشىلەردىڭ ولىمىنە قاتىستى قىلمىستىق ءىس قوزعالدى. ۇكىمەت «ارسەلورميتتال تەمىرتاۋ» اق مەنشىگىن قازاقستاننىڭ پايداسىنا بەرۋ جونىندەگى مامىلە قازىردىڭ وزىندە اياقتالىپ جاتقانىن مالىمدەدى. توقاەۆ امت باسقارۋدى قاراعاندى وبلىسى اكىمىنىڭ بۇرىنعى ورىنباسارى ۆاديم باسينگە تاپسىردى.
قازاقستاندا لاكشمي ميتتالدىڭ جاۋاپقا تارتىلۋىن تالاپ ەتكەن پەتيتسيا باستالدى.