تۇركىستان اۆتونومياسىن قۇرعان ساياسي قايراتكەر مۇستافا شوقايدىڭ تۋعان جەرى نارشوقىعا ەسكەرتكىش-بەلگى تاس قويىلدى، دەپ حابارلايدى "ادىرنا" ءتىلشىسى.
بۇل تۋرالى اقىن، جازۋشى قاسىمحان بەگمانوۆ Facebook جەلىسىندە جاريالادى.
اقىننىڭ سوزىنشە، قازاق مەملەكەتتىك، ساياسي جانە قوعام قايراتكەرى مۇستافا شوقايدىڭ كىندىك قانى تامعان ولكەسى نارشوقىعا ەسكەرتكىشتى ۇرپاقتارى مەن كاسىپكەرلەر قويعان.
"وسىنداي يگىلىكتى ءىستى ۇيىمداستىرىپ، ۇلى باباسىنىڭ ءومىرى مەن اتقارعان قىزمەتىن ەلگە جەتكىزۋدە "شىرىلداپ" ەڭبەك ەتىپ، عالىمدار مەن شوقايتانۋشىلارعا قامقور بولىپ جۇرگەن مۇستافا شوقايدىڭ ۇرپاعى گۇلبارشىن زايروۆا قارىنداسىم مەن مۇستافا شوقايدىڭ كۇيەۋبالاسى - ۇلت جاناشىرى، كاسىپكەر ايباتىر نىشانبايۇلى جۇماعۇلوۆقا ءوزىمنىڭ اعالىق العىسىمدى ايتامىن،-دەپ جازدى قاسىمحان بەگمانوۆ.
قازىرگى شيەلى اۋدانى نارشوقى اۋدانىنا مۇستافا شوقايعا ارناپ بەلگى-تاس قويىلۋىنا وراي قاراشا ايىنىڭ 15-ءى كۇنى قىزىلوردادا ەنتسيكلوپەديانىڭ تۇساۋكەسەرى وتپەك.
قۋانىشتى حابارمەن بولىسكەن جازۋشى:
"بۇكىل تۇركى مەملەكەتتەرىنىڭ پرەزيدەنتتەرى استاناعا جينالىپ جاتقان كۇنى مۇستافا شوقايداي عازيزىمىزدىڭ كىندىك قانى تامعان قاسيەتتى نارشوقىعا بەلگى-تاس قويىلۋى كەزدەيسوقتىق دەپ ويلامايمىن. مۇستافا شوقايدىڭ ۇرپاعى گۇلبارشىن زايروۆا مەن كۇيەۋ بالاسى ايباتىر جۇماعۇلوۆ وسى تاريحي ميسسيانى ابىرويمەن اتقارىپ شىقتى. بارشا قازاققا، بۇكىل تۇركىدۇنيەسىنە قۇتتى بولسىن!"-دەپ جازدى قاسىمحان بەگمانوۆ.
مۇستافا شوقاي – ەميگراتسياداعى كورنەكتى قوعام جانە مەملەكەت قايراتكەرى ءارى تۇركىستان اۆتونومياسىن قۇرۋشى.
مۇستافا شوقاي ۇلتتىق اۆتونوميالاردىڭ باسشىلارىمەن ساياسي كەڭەس وتكىزىپ، "نا رۋبەجە" گازەتىن شىعارۋعا اتسالىستى. قوعام قايراتكەرى قۋعىنعا ۇشىراپ، فرانتسيادا ءومىر سۇرگەن.
