قازاقستان پرەزيدەنتى قاسىم-جومارت توقاەۆ پەن رەسەي پرەزيدەنتى ۆلاديمير پۋتين قازاقستان مەن رەسەيدىڭ XIX وڭىرارالىق ىنتىماقتاستىق فورۋمىنا بەينەبايلانىس رەجيمىندە قاتىسىپ جاتىر، دەپ حابارلايدى “ادىرنا” ۇلتتىق پورتالى.
قازاقستان ازىق-تۇلىك قاۋىپسىزدىگى جونىندەگى يسلام ۇيىمىنىڭ نەگىزىن قالاۋشىلاردىڭ ءبىرى. بۇگىنگى تاڭدا ونىڭ قۇرامىنا جالپى حالقى شامامەن ءبىر جارىم ميلليارد ادام جانە 37 مەملەكەت كىرەدى. ءبىزدىڭ ەلدەرىمىز وسى ۇلكەن نارىقتا سەرتيفيكاتتالعان حالال ونىمدەرىنىڭ ەكسپورتىن بىرلەسىپ ىلگەرىلەتە الار ەدى. ءبىز رەسەيلىك بيزنەستى وسى باعىتتا تىعىز ىنتىماقتاستىققا شاقىرامىز، – دەدى توقاەۆ.
سونداي-اق، توقاەۆ قازاقستان مەن رەسەي ەكونوميكانىڭ بارلىق دەرلىك سالاسىندا ءوزارا ىنتىماقتاسا جۇمىس ىستەيتىنىن ايتتى.
ونىڭ ايتۋىنشا، رەسەيمەن ساۋدا-ەكونوميكا، ينۆەستيتسيا، ونەركاسىپتىك كووپەراتسيا سالاسىندا ءوزارا ءىس-قيمىل جىلدان-جىلعا تۇراقتى ءوسىپ كەلەدى.
بۇگىندە ەكىجاقتى ساۋدا اينالىمى 27 ملرد دوللارعا جەتتى، بۇل رەكوردتىق كورسەتكىش. رەسەيدەن تىكەلەي ينۆەستيتسيا كولەمى 20 ملرد دوللاردان استى. قازاقستاندا شەتەلدىڭ قاتىسۋىمەن جۇمىس ىستەيتىن 42 مىڭنان اسا كاسىپورىننىڭ جارتىسىنا جۋىعى، 19 مىڭىن رەسەيلىك كومپانيالار قۇرايدى. ءبىز ەكونوميكانىق بارلىق دەرلىك سالاسىندا – ونەركاسىپ، اۋىل شارۋاشىلىعى، كولىك، ينفراقۇرىلىمدا ءوزارا ىنتىماقتاسا جۇمىس ىستەيمىز، - دەدى توقاەۆ.
ايتا كەتەيىك، بۇگىن، 9 قاراشادا رەسەي پرەزيدەنتى ۆلاديمير پۋتين ەلىمىزگە رەسمي ساپارمەن كەلدى. مەملەكەت باسشىسى قاسىم-جومارت توقاەۆ شەتەلدىك ارىپتەسىن ەلوردا اۋەجايىندا قارسى الدى.
