ماجىلىستىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ءبىلىم بەرۋ جانە تالىمگەرلىك ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭى قابىلداندى. ەندى ساباق كەزىندە ۇيالى تەلەفون قولدانۋعا تىيىم سالىنادى، دەپ حابارلايدى “ادىرنا” ۇلتتىق پورتالى.
«ۇستازدارمەن بولعان كەزدەسۋلەردە تۇسكەن تاعى ءبىر ماسەلە وقۋشىلاردىڭ ساباق ۇستىندە تەلەفون پايدالانۋىنا قاتىستى. تەلەفونعا تىيىم سالۋعا زاڭنامادا ناقتى شەكتەۋ جوق. وسىعان وراي، جوباعا ساباق كەزىندە ۇيالى تەلەفونداردى پايدالانۋدى شەكتەۋ تۋرالى ارنايى نورما دا ەنگىزىلدى»، – دەدى دەپۋتات اسحات ايماعامبەتوۆ.
ءماجىلىس وكىلىنىڭ پايىمىنشا، وقۋ بارىسىندا بالا ساباق وقۋى كەرەك. سەبەبى تەلەفون بۇل پروتسەسكە كەدەرگى كەلتىرەدى.
«ءبىزدىڭ ۇسىنىپ وتىرعان نورمامىز تەك ساباق كەزىندە عانا شەكتەۋگە ارنالعان. ال بالانىڭ ۇزىلىستە پايدالانۋىنا شەكتەۋ بولمايدى. ساباق كەزىندە بالا الەۋمەتتىك جەلىلەردى قاراپ وتىرعانى دۇرىس ەمەس. ەگەر مۇعالىمنىڭ ساباق جوسپارىندا كەيبىر قوسىمشالاردى پايدالانۋ قاجەت بولسا، وندا ساباق كەزىندە يننوۆاتسيالىق تەحنولوگيالار ماقساتىندا سمارتفوندى قولدانۋعا رۇقسات ەتىلەدى. اتاپ ايتقاندا، جالپى مەكتەپتە پايدالانۋعا شەكتەۋ قاراستىرىلماعان»، – دەدى دەپۋتات.
