3 جەلتوقساندا سەربيانىڭ بەلگراد قالاسىندا «اعايىندى كاريچ قورى» سىيلىعىن تابىستاۋ ءراسىمى ءوتتى. قازاقستاندىق بەلگىلى ءانشى ديماش قۇدايبەرگەن دە اتالعان سىيلىققا يە بولدى. بۇل تۋرالى dimashnews سايتى جاريالادى، دەپ حابارلايدى “ادىرنا” ۇلتتىق پورتالى.
1979 جىلى ەلدىڭ عىلىمي-تەحنولوگيالىق جانە شىعارماشىلىق الەۋەتىن قولداۋ جانە ىلگەرىلەتۋ، جۇرتشىلىقتى الەمدىك مادەنيەتتىڭ جەتىستىكتەرىمەن تانىستىرۋ ينستيتۋتى رەتىندە قۇرىلعان قور 26-شى رەت كورنەكتى شەتەلدىك تۇلعالارعا سىيلىقتار تابىس ەتتى.
ايتا كەتەيىك، «اعايىندى كاريچ قورى» سىيلىعىنا بۇرىن الەمگە ايگىلى عىلىم، جۋرناليستيكا، ەكونوميكا، مادەنيەت جانە ونەر قايراتكەرلەرى يە بولعان. ءار جىلدارى فيزيكا بويىنشا نوبەل سىيلىعىنىڭ لاۋرەاتى ج. الفەروۆ، ادەبيەت بويىنشا نوبەل سىيلىعىنىڭ لاۋرەاتى پ. حاندكە، قازاقستاننىڭ تۇڭعىش پرەزيدەنتى ن. نازارباەۆ، كينورەجيسسەر ە. كۋستۋريتسا، تەننيسشى ن. دجوكوۆيچ، اكتەر س. سيگال، تۇركسويدىڭ بۇرىنعى باس حاتشىسى د. كاسەينوۆ ماراپاتقا يە بولعان.
بيىلعى جىلى سىيلىققا ۇسىنىلعان ەرەكشە تۇلعالار اراسىندا قازاقستاننىڭ دارىندى ءارتىسى ديماش قۇدايبەرگەن دە ماراپاتقا يە بولدى.
قوردىڭ ديرەكتورلار كەڭەسىنىڭ پىكىرىنشە، ديماشتىڭ ايرىقشا ۆوكالدىق دەرەكتەرى، ونىڭ كلاسسيكالىق جانە زاماناۋي ستيلدە ورىنداۋدىڭ ءارتۇرلى نىساندارىن بىرىكتىرۋدىڭ كەرەمەت قابىلەتى، كوپ جىلدىق جۇمىس پەن وقۋدىڭ ناتيجەسى رەتىندە كەز كەلگەن نوتانى ورىنداۋدىڭ بىرەگەي مۇمكىندىكتەرى ءارتىستى قازاقستان مادەنيەتىنىڭ جارقىن وكىلى، ءوز ءىسىنىڭ تابىستى مامانى رەتىندە اتاپ وتۋگە مۇمكىندىك بەرەدى.
«ءبىزدىڭ ديرەكتورلار كەڭەسى وسىنداي ماڭىزدى ءارتىس سىيلىقتىڭ ءىزاشارلارىنىڭ، وسى جولداعى تالانتتاردىڭ التىن سەرياسىنىڭ جالعاسى بولۋعا لايىق ەكەندىگىمەن ءبىراۋىزدان كەلىسەدى، بۇل ءبىزدىڭ دوستاس ەلدەرىمىز اراسىنداعى قارىم – قاتىناستى نىعايتادى»، – دەپ اتاپ ءوتتى سەربياداعى قازاقستان رەسپۋبليكاسىنىڭ قۇرمەتتى كونسۋلى، اعايىندى كاريچ قورىنىڭ نەگىزىن قالاۋشى ميلانكا كاريچ.
سەربيانىڭ ورتالىق مادەني شاراسى سەرب مادەنيەتى مەن ءداستۇرىن ايقىندايتىن مادەني مۇرا نىسانى – بەلگرادتاعى ۇلتتىق تەاتردا ءوتتى.
ۇلتتىق تەاتردىڭ كەرەمەت ساحناسىندا ديماش ءار ءتۇرلى كومپوزيتسيالار ۇسىندى: قازاقتىڭ حالىق ءانى «سامالتاۋ» جانە يگور كرۋتويدىڭ «Mademoiselle Hyde» شىعارماسى، وسىلايشا ءوز شىعارماشىلىعىنىڭ ءار ءتۇرلى قىرلارىن كورسەتتى.
ديماش اعايىندى كاريچ قورىنىڭ قۇرىلتايشىلارى مەن ديرەكتورلار كەڭەسىنە ياراپاتقا لايىق دەپ تانىعانى ءۇشىن العىسىن ءبىلدىردى، حالىقارالىق جوبالاردىڭ، سونىڭ ىشىندە ونەر سالاسىنداعى ەلدەر اراسىنداعى دوستىق پەن ءوزارا دامۋدى قولداۋ مۇمكىندىكتەرى رەتىندەگى ماڭىزدى ءرولىن اتاپ ءوتتى.
