سەمەيدە پوليتسەيلەر پويىز قىزمەتكەرلەرىنەن اقشا بوپسالاعان الاياقتى ۇستادى. ونىڭ قولىنان 60 ادام زارداپ شەكتى، دەپ حابارلايدى "ادىرنا" پورتالى Polisia.kz سايتىنا سىلتەمە جاساپ.
بەلگىلى بولعانداي، الاياق بۇعان دەيىن دە بىرنەشە رەت سوتتالعان ەكەن. ول بىرنەشە جىل بويى ءوزىن بلوگەر رەتىندە كورسەتىپ، ار-نامىسىنا تيەتىن بەينەماتەريالداردى تاراتامىن دەپ قورقىتىپ، پويىز جۇمىسشىلارىنان اقشا بوپسالاعان.
«ول جولاۋشى اتىن جامىلىپ، پويىزعا ءمىنىپ، جولاۋشىلار تاسىمالى سالاسىنداعى زاڭ بۇزۋشىلىقتاردى ۇيالى تەلەفونىنا جازىپ العان، سودان كەيىن ولاردى تاراتامىز دەگەن جەلەۋمەن جانە فيزيكالىق كۇش كورسەتەمىن دەپ قورقىتىپ، اقشا بوپسالاعان»، - دەيدى قازاقستان رەسپۋبليكاسى ىشكى ىستەر مينيسترلىگى دبوپ وكىلى قۋاندىق الپىس.
زارداپ شەككەندەر بوپسالاۋدان قورقىپ، پوليتسياعا حابارلاسپاعان.
«ۇيىمداسقان قىلمىسقا قارسى كۇرەس باسقارماسىنا «سيگنال» تۇسە باستاعاننان كەيىن عانا سوتتالۋشىنىڭ زاڭسىز ارەكەتى توقتاتىلدى. سوت سانكتسياسىمەن شابۋىل جاساعان ادام ۇستالىپ، قاماۋعا الىندى»، - دەپ قوستى قۋاندىق الپىس.
الاياق ءۇش جىل ىشىندە 48 ميلليون تەڭگە تاپقان. پوليتسەيلەر قىلمىستىق ءىستى سوتقا جولداپ ۇلگەردى.
