بۇگىن - قازاقتىڭ ءبىرتۋار ۇلى باۋىرجان مومىشۇلىنىڭ تۋعان كۇنى، دەپ حابارلايدى "ادىرنا" ءتىلشىسى.
داڭقتى قولباسشى 113 جىل بۇرىن قازىرگى جامبىل وبلىسىندا تۋعان.
باتىردىڭ ۇلى وتان سوعىسىنداعى ەرلىگى مەن وسيەت سوزدەرى ۇمىت بولماستان، ءالى كۇنگە دەيىن وسكەلەڭ ۇرپاققا ايتىلىپ كەلەدى.
باۋىرجان مومىشۇلى ءوزىنىڭ جىلدامدىعى مەن العىرلىعىنىڭ ارقاسىندا "شاڭتيمەس" دەگەن لاقاپ اتقا يە بولعان.
حالىق جاناشىرى، كەڭەس وداعىنىڭ باتىرى، قولباسشى، كورنەكتى جازۋشى بولا بىلگەن باۋىرجان مومىشۇلى اسكەردە تالاي ادامدى ءوز ونەرىمەن ءتانتى ەتكەن. ات قۇلاعىندا ويناپ، قىلىشپەن ويىن كورسەتۋدە اسقان ەپتىلىك تانىتىپ، بۋدەننىيدىڭ دا كوزىنە تۇسكەن. باتىردىڭ بەينەسى مەن بولمىسى ازىلحان نۇرشايىقوۆتىڭ 1976 جىلى جازىلعان تۋىندىسى "اقيقات پەن اڭىزدا" بەينەلەنگەن.
مومىشۇلى ۇلى وتان سوعىسىنا گەنەرال-مايور پانفيلوۆ باسقارعان ايگىلى ديۆيزيانىڭ قۇرامىندا 1941 جىلدان باستاپ بولعان. ول ماسكەۋ ءۇشىن شايقاستا 207 رەت ۇرىسقا كىردى.
تالاي ادامنىڭ ءومىرىن قيعان سوعىستا ديۆيزيا باسقارعان ەكى قازاقتىڭ ءبىرى – باۋىرجان مومىشۇلى. ال ەكىنشى قولباسشى – ابىلقايىر بايمولدين.
سونداي-اق، سوعىستان كەيىنگى جىلدارى مومىشۇلى تولىعىمەن شىعارماشىلىققا بەت بۇرعان. ول ءوز ومىرىندەگى كورگەن بىلگەندەرىنە سۇيەنە كىتاپ جازىپ، «قانمەن جازىلعان كىتاپ»، «ۇشقان ۇيا»، «موسكۆا ءۇشىن شايقاس» دەپ اتالاتىن تۋىندىلارى جارىق كورگەن. قولباسشى ەڭبەكتەرىن قازاق جانە ورىس تىلدەرىندە جارىققا شىعارعان.
