شىمكەنتتىك تۇرعىن التى بالانى ورتتەن امان الىپ قالدى، دەپ حابارلايدى "ادىرنا" ءتىلشىسى Otyrar.kz-كە سىلتەپ.
مارينا گافاروۆا ەسىمدى ايەل كورشىسىنىڭ ورتەنىپ جاتقان ۇيىنە كىرىپ، التى بالانى امان الىپ قالدى.
وقيعا بولعان ءتۇنى مارينا وتقا ورانعان بالالاردىڭ كومەككە شاقىرعان داۋىسىن ەستىپ، كومەككە اسىققان. ورتكە ورانعان ۇيدەن بالالاردىڭ داۋسىن ەستىگەن ايەل ءورت سوندىرۋشىلەردى كۇتەتىن ۋاقىتتىڭ جوق ەكەنىن ۇققان.
ول ويلانباستان ءۇيدىڭ تەرەزەسىن سىندىرىپ، ورتەنىپ جاتقان كورشى ۇيگە كىرىپ كامەلەتكە تولماعان التى بالانى الىپ شىققان.
ەرلىك جاساعان تۇرعىندى قۇتقارۋشىلار ماراپاتتادى.
مارينانىڭ ءتورت بالاسى بار. ول ءورتتى كورگەندە كومەككە اسىعىپ، ۇيدەن جالاڭاياق جۇگىرىپ شىققانىن ايتادى.
ۇيلەرىمىز ءبىر-بىرىنە وتە جاقىن ورنالاسقان. بالالاردىڭ جىلاعانىن ەستىپ، جۇگىرىپ شىقتىم. مۇندا گاز باللونى بار ەكەن. ول كەز كەلگەن مينۋتتا جارىلىپ كەتۋى مۇمكىن ەدى" – دەدى مارينا.
ول ۇيدەگى گاز باللوندى كورگەندە بىردەن كۇيەۋىن كومەككە شاقىرعان.
باسىلىمنىڭ اقپاراتىنشا، التى بالانىڭ اناسى ولاردى جالدامالى ۇيدە قاراۋسىز قالدىرعان. التى بالا ۇيىقتاماي، وتپەن ويناعان.
ايەل وسى ۇيدەن كامەلەتكە تولماعان التى بالانى قۇتقارىپ، ەرلىك كورسەتتى. ءورتتىڭ شىعۋ سەبەبى – بالالاردىڭ وتقا ابايسىز قاراۋى، – دەدى شىمكەنت قالالىق توتەنشە جاعدايلار دەپارتامەنتى باستىعىنىڭ ورىنباسارى ەركىن وتارعالىمۇلى.
مارينا گافاروۆا قۇتقارىلعان بالالاردىڭ اتا-انالارى ءتىپتى العىس تا ايتپاعانىن جەتكىزدى.
