"قازاقمىس" كەنىشىندە جۇمىسشى قايتىس بولدى، دەپ حابارلايدى "ادىرنا" ءتىلشىسى كazinform-عا سىلتەپ.
ۇلىتاۋ وبلىسىنداعى «جىلاندى» كەنىشىندە 31 جاستاعى ماشينيست مەرت بولدى. شاحتا ۋچاسكەلەرىنىڭ بىرىندە بولعان جازاتايىم وقيعانىڭ ءمان-جايى انىقتالۋدا.
««قازاقمىس» كومپانيالار توبى ۇلىتاۋ وبلىسىندا ورنالاسقان «جىلاندى» كەنىشىندە 26 جەلتوقسان كۇنى قايعىلى وقيعا بولعانىن قايعىرا حابارلايدى.
ساعات 18.30-دا شاحتا ۋچاسكەلەرىنىڭ ءبىرى – «شىعىس سارى-وبادا» وزدىگىمەن جۇرەتىن جەراستى ماشيناسىنىڭ ءوندىرىس ورنىنا قوزعالىسى بارىسىندا جۇرگىزۋشى 1992 جىلى تۋعان ءماشينيستتى ابايسىزدا باسىپ كەتتى. سالدارىنان جۇمىسشى ولىمگە الىپ كەلگەن اۋىر جاراقاتتار الدى.
«قازاقمىس» كومپانياسىنىڭ باسشىلىعى مەن ەڭبەك ۇجىمى قازا بولعان جۇمىسشىنىڭ تۋىستارى مەن جاقىندارىنا كوڭىل ايتادى»، - دەلىنگەن "قازاقمىس" كومپانيا جولداعان مالىمدەمەدە.
اتالعان كومپانيادا قىزمەتكەرلەردىڭ وندىرىستىك جاراقات الۋ كورسەتكىشى وتكەن جىلعا قاراعاندا 3 ەسە ارتقان. بۇل تۋرالى پرەمەر-مينيستر ءاليحان سمايىلوۆ ۇكىمەت وتىرىسىندا ايتتى.
ەڭ ءىرى مىس ءوندىرۋشى كومپانيا دەپ تانىلعان "قازاقمىس" كەنىشىندە اجال قۇشقاندار كوپ. وتكەن ايدىڭ ىشىندە كومپانيا ءتورت قىزمەتكەرىنەن ايىرىلدى. 6 قاراشا كۇنى شىعىس جەزقازعان كەنىشىنىڭ №57 شاحتاسىندا جۇمىسشى قايتىس بولدى. 22 قاراشادا «قازاقمىس» كومپانياسىنىڭ جەزقازعان بايىتۋ فابريكاسىندا ماشينيست مەرتىكتى. 27 قاراشادا كومپانيانىڭ جامبىل وبلىسىنداعى «جايسان» كەنىشىندە 1981 جانە 2002 جىلى تۋعان جۇمىسشىلار اۋىر جاراقات الىپ، كوز جۇمعان بولاتىن.
