اقتوبەدە توپتىق توبەلەس سالدارىنان ەكى ءجاسوسپىرىم پىشاق جاراقاتىنان قازا تاپتى، دەپ حابارلايدى “ادىرنا” پورتالى اقتوبە وبلىسى پروكۋراتۋراسىنىڭ ءباسپاسوز قىزمەتىنە سىلتەپ.
«2 قاڭتاردا Instagram جەلىسىندە كامەلەتكە تولماعان جىگىتتەر اراسىندا جانجال تۋىنداپ، ناتيجەسىندە كەلەسى كۇنى الماز دۇكەنىنىڭ جانىنا بىرەۋى ەكىنشىسىن كەزدەسۋگە شاقىردى. 2 قاڭتار كۇنى ساعات 23.00 شاماسىندا توپتىق توبەلەس كەزىندە كامەلەتكە ءجاسوسپىرىمدى پىشاقتاپ كەتكەن. ناتيجەسىندە ەكى كامەلەتكە تولماعان بالا العان جاراقاتتارىنان اقتوبەدەگى جەدەل جاردەم اۋرۋحاناسىندا ەسىن جيماستان كوز جۇمدى»، - دەلىنگەن سارسەنبى كۇنى تاراتقان حابارلامادا.
اتاپ وتكەندەي، توبەلەس تۋرالى حابارلاما «102» پۋلتىنە 3 قاڭتار كۇنى ساعات 00.10 شاماسىندا تۇسكەن.
«بىزگە اقتوبەدەگى قىزىلجار اۋىلىندا ورنالاسقان «الماز» دۇكەنىنىڭ جانىندا توپتىق توبەلەس بولىپ جاتقانى تۋرالى قوڭىراۋ ءتۇستى. وقيعا ورنىنا پوليتسيا دەپارتامەنتىنىڭ جەدەل-تەرگەۋ توبى مەن وبلىستىق پروكۋراتۋرانىڭ باسشىلىعى شىقتى»، - دەلىنگەن حابارلامادا.
قر قىلمىستىق كودەكسىنىڭ 99-بابىنىڭ 2-بولىگىنىڭ 1, 9 جانە 14-تارماقتارى بويىنشا (كىسى ءولتىرۋ) قىلمىستىق ءىس قوزعالدى.
«ءىس بويىنشا پروتسەسسۋالدىق پروكۋرور تاعايىندالدى. تەرگەۋ بارىسى وبلىس پروكۋرورىنىڭ جەكە باقىلاۋىنا الىندى»، - دەپ قوستى وبلىس پروكۋراتۋراسى.
