سەنات دەپۋتاتى، بۇرىنعى اقپارات جانە الەۋمەتتىك دامۋ ءمينيسترى دارحان قىدىرالى جوشىنىڭ قازاق حاندارىنىڭ ارعى اتاسى ەكەنىن كورسەتۋ ءۇشىن مەكتەپ وقۋلىقتارىن قايتا جازۋدى ۇسىندى، دەپ حابارلايدى “ادىرنا” پورتالى.
سەناتور دارحان قىدىرالى پرەمەر-مينيستر ءاليحان سمايىلوۆقا دەپۋتاتتىق ساۋال جولدادى.
"جوشى ۇلىسىنىڭ ىرگەسى قالانعانىنا 800 جىل تولۋى قازاق حالقىنىڭ شىنايى تاريحىنا ماڭىز بەرۋ ءۇشىن تاماشا مۇمكىندىك بولىپ وتىر. مەملەكەت باسشىسى تاياۋدا "ەگەمەن قازاقستان" گازەتىنە بەرگەن سۇحباتىندا وسى ايتۋلى داتانى ەسكە سالدى. پرەزيدەنت وسىعان وراي ءبىزدىڭ مەملەكەتتىلىگىمىزدىڭ تامىرى تەرەڭدە جاتقانىن ايگىلەيتىن وسى ايتۋلى داتاعا وراي اۋقىمدى زەرتتەۋلەر جۇرگىزۋ ماڭىزدى ەكەنىن اتاپ ءوتتى", – دەدى دەپۋتات.
ونىڭ ايتۋىنشا، وسىعان دەيىن تۇركى اكادەمياسى جوشى ۇلىسى تۋرالى زەرتتەۋلەر جۇرگىزىپ، ەكسپەديتسيالار ۇيىمداستىرعان، ءتىپتى يۋنەسكو-دا ءىس-شارا وتكىزگەن.
سەناتور بيىلعى جىلى اياقتالاتىن قازاقستان تاريحى بويىنشا كوپ تومدىق ۇلى جوشى حان تۋرالى دا تىڭ دەرەكتەر بەرەدى دەپ ۇمىتتەنەدى.
"مەكتەپ وقۋلىقتارى وسى كوپتومدىق نەگىزىندە قايتا جازىلعانى ابزال. وندا جوشىنىڭ قازاق حاندارىنىڭ اتاسى ەكەنى باسا ايتىلۋى ءتيىس. سونىمەن قاتار وقۋلىقتارعا قازاق مەملەكەتتىگىنىڭ باستاۋلارى تۋرالى دا سونى دەرەكتەر ەنگىزۋ كەرەك. ماسەلەن 6-7 سىنىپقا ارنالعان وقۋلىقتا موعولستان مەملەكەتىنە 1 پاراگراف، 10-سىنىپقا ارنالعان وقۋلىقتا 4-5 جول عانا ارنالعان. ال وسى موعولستان جەرىندە شۋ بويىندا قازاق حاندىعىنىڭ نەگىزى قالانعانى بەلگىلى", – دەدى سەناتور.
دارحان قىدىرالى ەلىمىزدىڭ جوعارى وقۋ ورىندارىنىڭ وقۋ باعدارلامالارىنا قازاقستان تاريحىنىڭ كەيىنگى نۇسقاسىن ەنگىزۋدىڭ ماڭىزدىلىعىن اتاپ ءوتىپ، وسىعان بايلانىستى ۇكىمەت باسشىسىنا بىرقاتار ۇسىنىستار جاسادى.
"جوشى ۇلىسىنا ارنالعان ىرگەلى زەرتتەۋلەر جۇرگىزۋ، ارنايى مۋزەي جاساقتاۋ، ەدىگە بايقاۋىن وتكىزۋ، ۇلىتاۋداعى ەسكەرتكىش كەشەندەردى يۋنەسكو ماتەريالدىق مۇرالار تىزىمىنە ەنگىزۋ دە وزەكتى. ەلىمىزدە وتەتىن دۇنيەجۇزىلىك كوشپەندىلەر ويىنى جوشىنى ناسيحاتتاۋ ءۇشىن ۇلكەن مۇمكىندىك. سوندىقتان ولارعا اقپاراتتىق قولداۋ كورسەتۋ، تانىمدىق دەرەكتى جانە كوركەم فيلمدەر مەن بالالارعا ارنالعان مۋلتفيلمدەر ۇسىنۋ دا ماڭىزدى", – دەدى سەناتور.
