الماتى قالاسىنىڭ توتەنشە جاعدايلار دەپارتامەنتى (تجد) جەر سىلكىنىسىن ەرتە حابارلاۋ جۇيەسىنە قاتىستى جاعدايعا تۇسىنىكتەمە بەرە وتىرىپ، ونىڭ سىناق كەزەڭىنەن ءوتىپ جاتقانىن ايتتى، دەپ حابارلايدى "ادىرنا" ۇلتتىق پورتالى.
«2023 جىلدىڭ سوڭىندا الماتى قالاسى توتەنشە جاعدايلار دەپارتامەنتىنىڭ تاپسىرىسى بويىنشا اۆتوماتتاندىرىلعان الدىن الا ەسكەرتۋ جۇيەسىنىڭ (ااەج) 28 سەيسميكالىق ستانساسىنىڭ قۇرىلىسى اياقتالدى. جوبا كەزەڭ-كەزەڭىمەن جۇزەگە اسىرىلدى: 2022 جىلعا – 11 سەيسميكالىق ستانسانىڭ قۇرىلىسى، 2023 جىلعا – 17 سەيسميكالىق ستانسانىڭ قۇرىلىسى. قازىرگى ۋاقىتتا جۇيە سىناقتىق پايدالانۋعا بەرىلدى جانە شەتەلدىك تاجىريبەگە سايكەس، اپروباتسيالىق كەزەڭنەن ءوتىپ، سىناق رەجيمىندە. جۇيەنى تەستىلەۋ كەزەڭى شامامەن ءبىرىنشى جارتىجىلدىقتىڭ سوڭىنا دەيىن سوزىلادى»، - دەلىنگەن سارسەنبىدە تاراتقان حابارلامادا.
ەسكە سالايىق، 23 قاڭتاردا الماتىدا بولعان جەر سىلكىنىسىنەن كەيىن ەل دۇرلىكتى. تابيعي اپاتتىڭ الدىن الا ەسكەرتىلمەگەنىنە قاتىستى سىن ايتىلدى. ارتىنشا اپاتتى الدىن الا حابارلاۋدىڭ اۆتوماتتاندىرىلعان جۇيەسىنە 1,1 ملرد تەڭگە جۇمسالعانى، دەسە دە ونىڭ جۇمىس ىستەمەي قالعانى بەلگىلى بولدى. الماتىلىقتاردى جەر سىلكىنىسى تۋرالى الدىن الا ەسكەرتۋگە جاۋاپتى جانە كورسەتەتىن قىزمەتى ءۇشىن 1,1 ملرد تەڭگە العان كومپانيا ەكس-پرەزيدەنت نازارباەۆتىڭ جيەنى ءنۇرالى اليەۆكە تيەسىلى ەكەنىن «ادىلدىك جولى» قوعامدىق بىرلەستىگىنىڭ (قب) اتقارۋشى ديرەكتورى ديدار سماعۇلوۆ ايتتى.
