ەكس-پرەزيدەنت نۇرسۇلتان نازارباەۆتىڭ ەكىنشى ايەلى اسەل قۇرمانباەۆاعا قاتىسى بار الماتى تەاترى ساتىلىمعا شىعارىلدى، دەپ حابارلايدى “ادىرنا” ۇلتتىق پورتالى قازتاگقا سىلتەمە جاساپ.
بەلگىلى بولعانداي، تەاتر وكىلى تەاتردى ساتۋ تۋرالى اقپاراتتى راستاي نەمەسە جوققا شىعارا المادى، سونىمەن قاتار نىساندى ساتۋعا قاتىستى سۇراققا كىم جاۋاپ بەرە الاتىنىن دا ايتا المادى.
«ورتالىق ازيا مادەنيەت پەن ونەردى قولداۋ قورى» ونەرگە دەگەن قىزىعۋشىلىعىن جوعالتتى. ءتىپتى، جوسپارلانعان قارجىلاندىرۋ دا توقتاتىلعان. سوڭعى دەرەك بويىنشا قازىر ولاردا قاتاڭ تەكسەرۋ ءجۇرىپ جاتىر. «شابىت» ۋنيۆەرسيتەتىندەگى «شيەلەنىستەن» سوڭ ايمان مۇساحودجاەۆا ءوز ەركىمەن قىزمەتىنەن كەتتى. ودان سوڭ حورەوگرافيا اكادەمياسىندا اۋديت جۇرگىزىلدى، بىراق شي شىقپادى. قازىر قۇرمانباەۆانىڭ «باسقان ءىزى» تەرگەلۋدە»، – دەيدى تاعى ءبىر دەرەككوزى.
قازىر الماتى تەاترىنىڭ ءبىرىنشى ديرەكتورى – 25 جاستاعى شالباەۆ ەرسۇلتان مىرزاحانۇلى.
2023 جىلى ديرەكتور شالباەۆ الماتى تەاترىنىڭ باسشىسى ديانا زايروۆانىڭ ورنىن باسقان. كەيىن زايروۆا مەن قۇرمانباەۆانىڭ بايلانىسى بارى بەلگىلى بولدى. بەلگىلى بولعانداي، زايروۆا «ورتالىق ازيا مادەنيەت پەن ونەردى قولداۋ» قورىن باسقاردى. ال قۇرمانباەۆا زايروۆا نەگىزىن قالاعان «ATBco» جشس-ءىن باسقارعان. ال «ATBco» كليەنتتەرىنىڭ قاتارىنا جوعارىدا اتالعان حورەوگرافيا اكادەمياسى كىرەدى.
«تەاتر «حالىق بانكىنىڭ» مەنشىگىندەگى جەرگە نازارباەۆتىڭ كۇيەۋ بالاسى تيمۋر قۇلىباەۆتىڭ ءوزى باسقاراتىن “بازيس-ا” كومەگىمەن سالىنعان دەگەن بولجام بار.
قىزىعى، ول قۇنى 10 ميلليون تۇراتىن تەاتردى 50 ميلليون دوللارعا باعالاعان جانە نازارباەۆقا سول باعانى ۇسىنعان دەگەن دە دەرەكتەر ايتىلادى.
جوعارىدا ايتقانداي، 16 قاڭتاردا بەلگىلى قازاقستاندىق سكريپكاشى ايمان مۇساحودجاەۆا قازاق ۇلتتىق ونەر ۋنيۆەرسيتەتىنىڭ رەكتورى قىزمەتىنەن كەتىپ، ۋنيۆەرسيتەت باسشىلىعى اۋىستى. سونداي-اق اباي اتىنداعى مەملەكەتتىك اكادەميالىق وپەرا جانە بالەت تەاترىندا دا كادرلىق اۋىسۋلار بولۋى مۇمكىن.
ەسكە سالايىق، بۇعان دەيىن ەكس پرەزيدەنت نۇرسۇلتان نازارباەۆ جارىق كورگەن «مەنىڭ ءومىرىم. بوداندىقتان – بوستاندىققا» اتتى كىتابىندا ەكىنشى ايەلى مەن ودان سۇيگەن ەكى ۇلى بارىن جازعان بولاتىن.
“ادىرنا” ۇلتتىق پورتالى
