قاراعاندىدا جەدەل جاردەم جۇرگىزۋشىسىن سوققىعا جىققان ەر ادامعا ىزدەۋ جاريالاندى. بارلىق ساۋدا ۇيلەرىندە، پلاكاتتار مەن باعانالاردا، اۋلاداعى دۇكەندەر مەن ءدارىحانالاردا پوليتسەيلەر كۇدىكتى نۇربولات داكەباەۆتى ىزدەستىرۋ تۋرالى حابارلامالار ءىلدى.
قۇقىقتىق ستاتيستيكا جانە ارنايى ەسەپكە الۋ پورتالىندا ىشكى ىستەر مينيسترلىگى 1987 جىلى تۋعان نۇربولات داكەباەۆتى ىزدەۋگە جاريالادى. ىزدەستىرۋ جۇمىستارىن قاراعاندى قالاسىنىڭ جاڭا-مايقۇدىق پوليتسيا ءبولىمى جۇرگىزىپ جاتىر.
قاراعاندى قالاسىنىڭ جاڭا-مايقۇدىق پوليتسيا ءبولىمىنىڭ قىزمەتكەرلەرى نۇربولات داكەباەۆتىڭ جۇرگەن جەرى تۋرالى مالىمەت بىلەتىندەردەن 102 نەمەسە 8 (7212) 40 79 19 تەلەفوندارىنا حابارلاسۋلارىن سۇرايدى.
ەستەرىڭىزگە سالا كەتەيىك، جەدەل جاردەم جۇرگىزۋشىسى 27 قاڭتارعا قاراعان ءتۇنى سوققىعا جىعىلدى. پوليتسەيلەر كۇدىكتىنى انىقتاپ، ونى ۇستاۋ شارالارى جۇرگىزىلىپ جاتقانىن حابارلادى. قاراعاندىدا سوققىعا جىعىلعان جەدەل جاردەم كولىگىنىڭ جۇرگىزۋشىسى ميى شايقالىپ، سىنىقتارىمەن اۋرۋحاناعا تۇسكەن بولاتىن.
