توعىزىنشى سىنىپتا وقيتىن وقۋشى ءوز قۇربىسىنىڭ تاماعىن كەسىپ جىبەرگەن، دەپ حابارلايدى "ادىرنا" ءتىلشىسى ينفورمبيۋرو جاڭالىقتارىنا سىلتەپ.
تاراز قالاسىنداعى №35 مەكتەپتە بولعان سۇمدىق وقيعا ۇلكەن دۇربەلەڭ تۋدىردى.
وقۋشى قىز ءوز سىنىپتاسىن سەرۋەندەۋگە شاقىرعان. سول ساتتە ول ءوزىنىڭ قۇربانىنا پىشاق الا جۇگىرىپ، تاماعىن وسىپ ۇلگەرگەن.
قىلمىس جاساعان قىز تەرگەۋ بارىسىندا بۇل ىسكە ءوزى ەمەس، ىشىندەگى داۋىس يتەرمەلەگەنىن ايتتى. ونىڭ ۇيالى تەلەفونىنان دا ءولىم-ءجىتىم، قاندى وقيعا جايىندا كينولاردى تاپقان.
كۇدىكتىنىڭ اناسى قىزىنىڭ بۇل جاعدايىن بىلەتىن بولىپ شىقتى. ءتىپتى ءجاسوسپىرىم ءوزىن ولتىرۋگە دە بىرنەشە رەت وقتالعان ەكەن. الايدا قىزىنىڭ بولاشاعىنا الاڭداعان اناسى ونى پسيحيكالىق اۋرۋحاناعا اپارماي، مىنەزىن باسۋعا تىرىسقان.
“قىزىم سول پىشاقتى قالاي ۇستاعانىن بىلمەي وتىر. ول ۇيگە كەلگەندە قان بولىپ كەلدى. ءتىپتى ءوزىنىڭ قولىن كەسىپ تاستاعان. جىلاپ تۇرىپ: “ماما، مەن جاساعان جوقپىن. ماعان ىشكى داۋىس جاسا دەپ ايتتى” دەيدى. ، – دەدى قىزدىڭ اناسى نازگۇل دىنباەۆا.
ال مەكتەپ اكىمشىلىگى بۇل جاعدايعا الاڭداۋلى ەكەنىن ايتتى.
“پىشاقتى ءبىر اپتا بۇرىن دۇكەننەن العان. سىنىپتاسىن دا “سويلەسەيىك، سەرۋەندەپ ءجۇرىپ قايتايىق” دەپ شاقىرىپ الادى. كەيىننەن وقۋشىلار 6-شاعىن اۋداننىڭ 29-ءۇيىنىڭ ارتقى جاعىندا كۇن باتاتىن كەزدە پىشاق سەرمەپ العان. جاساپ وتىر. قىزدىڭ تەلەفونىنان“كريك" سىندى قورقىنىشتى كينولار تابىلعان. وقۋشى قىز “ىشكى داۋىسىم وسىلاي ىستەپ دەپ ايتتى” دەپ وتىر”، – دەدى №35 ورتا مەكتەبى قۇقىقتىق تاربيە جونىندەگى ديرەكتوردىڭ ورىنباسارى عابيت كادەروۆ.
سىنىپ جەتەكشىسىنىڭ ايتۋىنشا پىشاقتىڭ ءجۇزى كۇرە تامىرعا جەتپەي، ادام ءومىرىن ساقتاپ قالعان. قازىر زارداپ شەككەن قىزدىڭ جاعدايى جاقسى ەكەن.
قۇزىرلى ورگان جاعدايعا قاتىستى ءىس قوزعاپ، تەرگەۋدى باستادى.
ال وقۋشىنىڭ احۋالىن بىلە تۇرا، ونى بۇركەمەلەگەن مەكتەپ باسشىسى مەن پسيحولوگ ءوز ەركىمەن قىزمەتتەن شەتتەتىلدى.
