بىرنەشە كۇن بۇرىن 73 جاسقا تولعان اقىن، قازىرگى ايتىس ونەرىنىڭ ۇيىمداستىرۋشىسى، قازاقستاننىڭ ەڭبەك سىڭىرگەن قايراتكەرى بىراز ۋاقىتتان بەرى توسەك تارتىپ، سىرقاتتانىپ قالعان بولاتىن. قازىرگە كەزدە اقىننىڭ جاعدايى جاقسى، دەپ حابارلايدى “ادىرنا” ۇلتتىق پورتالى.
بۇل تۋراسىندا اقىن “تاڭشولپان” باعدارلاماسىندا ايتىپ بەردى. ونىڭ ايتۋىنشا، بۇل دەرت – مۇشەل جاسىنىڭ سىناعى.
"قازاقتىڭ مۇشەل دەيتىن ىرىمى بار عوي، ماعان سول اينىماي كەلەدى دە تۇرادى. 13 جاسىمدا نە بولعانىن بىلمەيمىن، بىراق 25 جاسىمدا ءبىر قويشىنىڭ ۇيىندە اتتىڭ ۇستىندە وتىرعان جەرىمنەن قۇتىرعان يت قاپتى. 37 مۇشەلىمدە قولىمدى سىندىرىپ الدىم، 49 مۇشەلىمدە شەشەمدى الىپ كەتتى. 61 جاسىمدا اۋرۋ اينالدىرا باستادى. وسىدان امان-ەسەن شىعىپ كەتسەم، تاعى ءبىراز جۇرە تۇراتىن شىعارمىن دەپ ويلايمىن. تۋعان كۇندە ۋايىم باسادى، ءومىر زاۋلاپ ءوتىپ بارا جاتىر عوي. تۋعان كۇن تويلايتىن بالا ەمەسپىن، وتباسىلىق مەرەكە. جان-جاقتان كەلىندەرىم، تۋىستارىم كەلىپ، قۇتتىقتاپ جاتىر. ەكى-ءۇش جىلدان بەرى اۋىرىپ، ارباعا تاڭىلىپ ەدىم. قازىر ەپتەپ اياققا تۇردىم. سوعان قۋانىپ جاتىر”، – دەپ اقىن ءوز جاعدايى تۋرالى ايتتى.
سونداي-اق ول ساۋىعىپ كەتۋىن حالىقتىڭ تىلەگى جانە اقجارقىن نيەتىمەن بايلانىستىردى. ونىڭ ايتۋىنشا، دەرتىنە شيپا بولعان ءدارىنى ءبىر كەلىنشەك “تۇسىمدە ايان بەردى” دەپ اكەلىپ بەرگەن كورىنەدى.
“استانا مەن الماتىدان بولەك شەتەلدە دە ەم الدىم. ونى حالىق جاقسى بىلەدى. ءبىر قىزىعى، الماتىنىڭ ىرگەسىندە كۇرىشتىڭ قاۋىزىنان كاپسۋلا جاسايتىن زاۋىت بار ەكەن. قاراقات دەگەن ديرەكتورى توعىز جىلدان بەرى وسى ءدارىنى جاساپ شىعارادى. ءبىر كۇنى ماعان حابارلاسىپ، “تۇسىمدە مىنا ءدارىڭدى ءجۇرسىن ەرمانعا اپارىپ بەر” دەپ ايتتى دەيدى. ماعان اكەلىپ بەردى. سونى ىشكەلى قان قىسىمىم ءتۇسىپ، قان قۇرامىنان قانت ازايىپ، اياعىمدى باسىپ قالدىم. الىسقا بارا الماسام دا، تاياعىما سۇيەنىپ، ەپتەپ جۇرەمىن. ءبىر جاعى ويلايمىن، قانشاما ادام ماعان تىلەكشى بوپ، ساۋلىعىمدى سۇراپ جاتىر. سونىڭ دا ءبىر اسەرى بولعان شىعار”، – قانشا حالىق ماعان تىلەكتەس بولىپ، ساۋلىعىمدى تىلەدى. سونىڭ دا ءبىر اسەرى تيگەن شىعار دەپ ويلايمىن", - دەدى ءجۇرسىن ەرمان.
“ادىرنا” ۇلتتىق پورتالى
