جوعارى وقۋ ورىندارىندا ءبىلىم الاتىن ستۋدەنت قىزداردىڭ جەكە دەرەكتەرى تاراپ كەتتى، دەپ حاباردايدى "ادىرنا" ءتىلشىسى.
بۇل جاعدايعا قاتىستى عىلىم جانە جوعارى ءبىلىم ءمينيسترى ساياسات نۇربەك پىكىر ءبىلدىردى.
WhatsApp قوسىمشاسىندا 190 ادامنان تۇراتىن تۇتاس توپقا ستۋدەنتتەر ءتىزىمى بار 4 قۇجات جىبەرىلگەن. ول قۇجاتتا ستۋدەنتتەردىڭ جەكە دەرەكتەرى، جسن، ۇيالى تەلەفون نومىرلەرى، اتى-جوندەرى مەن جەكە مەديتسينالىق مالىمەتتەر دە تاراعان.
قۇجاتتا ارنايى قىزىل تۇسپەن بەلگىلەنگەن ستۋدەنتتەر مىندەتتى فليۋوروگرافيالىق باقىلاۋدان ءوتۋى كەرەك بولعان.
توپقا كەلگەن تىزىمدەردە ستۋدەنتتەر تۋرالى تىم جەكە اقپاراتتار دا بولعان. وندا قىزداردىڭ "قىز", قايسىسى "قىز ەمەس" ەكەنى تۋرالى اقپارات تا بولعانى ايتىلۋدا.
"بۇل جەردە تىكەلەي زاڭ بۇزۋشىلىق بولعاندىقتان ماسەلە باقىلاۋعا الىندى. كىنالىلەر قولدانىستاعى زاڭناما اياسىندا جازالانادى. جەكە دەرەكتەردى قورعاۋ تۋرالى زاڭ بار. بۇل اكىمشىلىك قۇقىق بۇزۋشىلىق تۋرالى ماسەلە بولىپ وتىر", - دەدى مينيستر ساياسات نۇربەك.
مينيستر بۇل دەرەكتى تاراۋىنا سەبەپ جاۋاپتىلاردىڭ سالعىرتتىعى ەكەنىن ايتتى.
"مويىنداۋ كەرەك، بۇل ماسەلەنى زاڭمەن قاتاڭىراق رەتتەۋ كەرەك. جالپى، بۇل مادەني ماسەلە. ۋنيۆەرسيتەتتە مۇنداي فاكتىلەردىڭ بار ەكەنى قىنجىلتادى. جەكە دەرەكتەر وتە قۇپيا اقپارات بولىپ تابىلاتىنى تۋرالى قاتاڭ زاڭنامالىق تالاپ بولمايىنشا، مادەنيەت وزگەرمەيدى", - دەپ ءتۇسىندىردى ول.
