مونشا كەشەندەرىنىڭ سۋدى تۇتىنۋ كولەمى جىلىنا شامامەن 120 ملن تەكشە مەتردى قۇرايدى. بۇل تۋرالى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ ماجىلىستە وتكەن دوڭگەلەك ۇستەلدە ايتتى، دەپ حابارلايدى “ادىرنا” ۇلتتىق پورتالى.
ونىڭ ايتۋىنشا، سۋدى قايتا پايدالانۋ تيىمدىلىگىن ارتتىرۋعا بارلىق نەگىز بار.
"بىرىنشىدەن، بۇل اۆتوكولىك جۋ جانە باسقا دا قىزمەت كورسەتۋ كاسىپورىندارىنا قاتىستى. مىسالى، 2023 جىلعى 1 قازانداعى جاعداي بويىنشا قازاقستاندا تىركەلگەن اۆتوكولىك قۇرالدارىنىڭ سانى شامامەن 5 ملن بىرلىكتى قۇرادى. ورتاشا العاندا وزىنە-ءوزى قىزمەت كورسەتەتىن ورىنداردا ءبىر ماشينانى جۋعا ارنالعان سۋ شىعىنى شامامەن 200-250 ءليتردى قۇرايدى. جۇك ماشينالارى مەن اۆتوبۋستارعا كەلگەندە سۋ شىعىندارى 500-700 ليترگە دەيىن ارتادى. بۇل جىلدىق ماندە شامامەن 100 ملن تەكشە مەتر سۋدى قۇرايدى. ال مونشا كەشەندەرىنىڭ سۋدى تۇتىنۋى جىلىنا شامامەن 120 ملن تەكشە مەتردى قۇرايدى", - دەپ اتاپ ءوتتى سپيكەر.
نۇرجان نۇرجىگىتوۆ شوب وبەكتىلەرىندە "تازا سۋدىڭ" ناقتى قولدانىلۋىن ەسكەرىپ، سۋ رەسۋرستارىن قايتالاما پايدالانۋ تەحنولوگيالارىن ەنگىزۋ قاجەت ەكەنىن ايتتى.
"جەرگىلىكتى تازارتۋ قۇرىلىستارى تەحنولوگيالارىن قولدانۋ، اتاپ ايتقاندا كولىك جۋ ورىندارىندا ورتالىقتاندىرىلعان سۋمەن جابدىقتاۋ كوزدەرىنەن "تازا سۋدى" تۇراقتى قوسپاي جانە تۇتىنباي، سۋ رەسۋرسىن قايتالاما جانە تۇراقتى اينالىمعا قوسۋعا مۇمكىندىك بەرەدى", - دەدى مينيستر.
