Monsha keshenderiniń sýdy tutyný kólemi jylyna shamamen 120 mln tekshe metrdi quraıdy. Bul týraly Sý resýrstary jáne ırrıgaııa mınıstri Nurjan Nurjigitov Májiliste ótken dóńgelek ústelde aıtty, dep habarlaıdy “Adyrna” ulttyq portaly.
Onyń aıtýynsha, sýdy qaıta paıdalaný tıimdiligin arttyrýǵa barlyq negiz bar.
"Birinshiden, bul avtokólik jýý jáne basqa da qyzmet kórsetý kásiporyndaryna qatysty. Mysaly, 2023 jylǵy 1 qazandaǵy jaǵdaı boıynsha Qazaqstanda tirkelgen avtokólik quraldarynyń sany shamamen 5 mln birlikti qurady. Ortasha alǵanda ózine-ózi qyzmet kórsetetin oryndarda bir mashınany jýýǵa arnalǵan sý shyǵyny shamamen 200-250 lıtrdi quraıdy. Júk mashınalary men avtobýstarǵa kelgende sý shyǵyndary 500-700 lıtrge deıin artady. Bul jyldyq mánde shamamen 100 mln tekshe metr sýdy quraıdy. Al monsha keshenderiniń sýdy tutynýy jylyna shamamen 120 mln tekshe metrdi quraıdy", - dep atap ótti spıker.
Nurjan Nurjigitov ShOB obektilerinde "taza sýdyń" naqty qoldanylýyn eskerip, sý resýrstaryn qaıtalama paıdalaný tehnologııalaryn engizý qajet ekenin aıtty.
"Jergilikti tazartý qurylystary tehnologııalaryn qoldaný, atap aıtqanda kólik jýý oryndarynda ortalyqtandyrylǵan sýmen jabdyqtaý kózderinen "taza sýdy" turaqty qospaı jáne tutynbaı, sý resýrsyn qaıtalama jáne turaqty aınalymǵa qosýǵa múmkindik beredi", - dedi mınıstr.
